KUCHING: Kolej Universiti i-CATS deka nyendia tiga program baru ba bidang aeroangkasa belabuh Ogos tu, seriris enggau juluk ngangkatka Sarawak nyadi hab pelajar teknikal enggau pansik ngena teknologi tinggi di rantau tu.
 
Mandal Canselor i-CATS, Prof. Emeritus Datuk Dr. Ts. Mohamad Kadim Suaidi madah, program keterubah Bachelor of Aerospace Engineering deka dilanchar bulan Ogos 2025, dientudi dua da program ba taun nanngkan nya iya nya Bachelor of Technology (Avionics) enggau Bachelor of Technology (Aircraft Maintenance).
 
“Fakulti Kejuruteraan Aeroangkasa ti baru ditumbuh tu deka nyadi penyungkak ngagai pemansang industri aeroangkasa nengeri, ukai semina nengah pelajar aja, tang nengah pansik baka pemansang mikrosatelit enggau pengulih roket dilanchar ari Sarawak,” ku iya lebuh dirandau ba Pengawa Nutup Sarawak Aerospace Transformation Forum 2025 di Raia Hotel Kuching, kena Hari Empat.
 
Ku iya, pengawa nirika kampus besai baru i-CATS di Kampung Trombol disadang belabuh Februari taun baru pengudah proses tinda lalu nyiri kunteriktor diatur.
 
Ba renggat keterubah, kampus baru nya ulih endur entara 2,500 ngagai 3,000 nembiak, alai sebagi ari nembiak agi ba kampus ke diatu di Jalai Stampin.
 
“i-CATS tetap nyadi universiti teknikal ti nyelinting bidang kejuruteraan, sains komputer, IT, kuasa enggau teknologi.
 
“Taja pia, kitai mega ngetanka elemen sebela ba nyendiaka program ekonomi, dagang, akaun, pelajar, dagang temuai enggau hospitaliti,” terang iya.
 
Iya mega meri terima kasih ngagai Perintah Sarawak ti meri sukung tegut ngagai pemansang kampus enggau inisiatif pelajar bepelasarka teknologi tinggi, seriris enggau tunga kuing Strategi Pemansang Pengudah COVID-19 (PCDS) 2030 enggau Pelin Besai Ekonomi Digital nengeri.
 
Program baru tu nerima semua nembiak, tang anak Sarawak dikenulu nengah inisiatif pra-pelajar sereta bantu baka insentif mata duit RM1,200 ti disadang dikredit ngagai nembiak bulan Jun.-EDISI UKAS