KUCHING: China Energy Engineering Investment Corporation Limited (CEEIC) merambu meranak puku sepenyampau RM6 bilion (USD1.35 bilion) ba sektor kuasa beresi Sarawak, ti nyelinting kuasa solar, nyimpan kuasa ngena bateri enggau pemansang infrastruktur grid.
 
Pengawa meranak puku nya diperambu nengah siti sempekat pemereti ati (MoU) ti ditanggam begulai InvestSarawak.
 
Ku Sapit Premier Sarawak Datuk Amar Awang Tengah Ali Hasan, sempekat strategik entara kededua raban ngemansangka projek kuasa ulih dikemaru besai enggau kapasiti manggai 2 gigawatt (GW), nyengkaum pemansang sistem nyimpan kuasa bateri enggau infrastruktur grid penyikap.
 
Iya madah, Perintah Sarawak nerima manah MoU nya laban pelin Sarawak mansutka kuasa ulih dikemaru sepenyampau 15GW manggai taun 2035.
 
"Kami nerima manah perambu projek kita ti ngaul pengawa mansutka kuasa solar sepenyampau 2GW enggau puku diperambu penyampau USD1.35 bilion.
 
"Nengah kerejasama tu, InvestSarawak begulai enggau Sarawak Energy Berhad (SEB) deka bekerejasama rat enggau CEEIC dikena ngelala endur projek ti engkeman ngambi ngemuntangka pengawa meranak puku ti diperambu,” ku iya.
 
Iya nyebut jaku nya lebuh bejaku ba Pengawa Nyain MoU entara InvestSarawak enggau CEEIC ba siti hotel tebilang ditu kena Hari Empat.
 
Ari bekenaka raban pakar CEEIC ku iya, Perintah Sarawak andal ke projek nya deka ulih dipejalai enggau lanchar, sikar enggau mujur sereta kerejasama rat nya ulih nempa pengidup dudi hari ti meruan.
 
Berebak enggau nya, Menteri Dagang Antarabansa, Industri enggau Meranak Puku nya udah meda pengawa besilih MoU entara Tuai Pegawai Eksekutif InvestSarawak Timothy Ong enggau Tuai Kaban Ekonomi enggau Menijar Besai Opis Menua Luar CEEIC He Lei.
 
Sama datai Sapit Menijar Besai CEEIC, Wang Honggang; Sapit Menteri Utiliti enggau Telekomunikasyen (Sarawak Energy Berhad & PETROS), Dato Ibrahim Baki; Sapit Menteri Dagang Antarabansa, Industri enggau Meranak Puku, Datuk Dr Malcolm Mussen Lamoh; Sapit Menteri Nembiak, Lumba enggau Pemansang Orang Dagang Datuk Dr Ripin Lamat enggau Tuai Pegawai Operasyen Kumpulan Sarawak Energy, James Ung. -EDISI UKAS