KUCHING: Chairman Affin Bank deka diputus pengudah bulih pemendar ari Bank Negara Malaysia (BNM).
 
Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, kandang diatu, raban sida udah bisi chalun mangku pengawa nya ti agi nganti prosedur chiri ngaul BNM.
 
“Chalun udah bisi, tang pekara tu kitai patut berunding ke prosedur bank menua laban pengawa nyiri tu patut dikemendar ke BNM.
 
“Enti kitai berati diatu, Kaunsil Affin Bank bejalai enggau manah,” ku iya lebuh dirandau media pengudah ngulu Pengerami Rindok Raya 2025 diatur Kaunsil Pemansang Koridor Kandang Menua (RECODA), ba siti hotel tebilang ditu kena Hari Empat.
 
Datuk Patinggi Abang Zohari madah baru, prestasyen Affin Bank naka diatu ba tikas ngemantupka ati, ke alai sida bisi perambu dudi hari melanja projek-projek di Sarawak.
 
Berebak enggau nya, iya mega meri terima kasih ngagai ex-Menteri Besai Malaysia Kelima, Niang Tun Abdullah Ahmad Badawi ti udah ninggalka legasi besai ngagai Sarawak ari perambu numbuhka RECODA lebuh ngelancharka agensi pemansang di selampur menua.
 
“RECODA tu asil ari perambu Niang Tun Abdullah Ahmad Badawi alai tu nyadi legasi ti ditinggalka iya lebuh iya ngelancharka agensi pemansang di selampur Malaysia.
 
“Entara ti dilanchar nyengkaum Wilayah Ekonomi Koridor Utara (NCER) ungkup sitak utara Semenanjung Malaysia, ungkup Sarawak RECODA enggau siti da agensi sebaka ungkup nengeri Sabah.
 
“Tu mih legasi niang ti disulur kitai nyentuk diatu,” ku iya madah baru.
 
Ba pengerami nya, Datuk Patinggi Abang Zohari ngemataka pengawa nyua pemeri RM15,000 ari Pertama Ferroalloys ngagai Kaunsil Pengintu Pengelantang Anak Patu Balu Nengeri Sarawak (PERYATIM).
 
Nambah ke nya, iya mega bisi nyua pemeri Duit Raya ngagai orang ti diau ba PERYATIM.
 
Sama datai tiga Sapit Premier Sarawak Datuk Amar Douglas Uggah Embas, Datuk Amar Awang Tengah Ali Hasan enggau Datuk Amar Profesor Dr Sim Kui Hian, Sapit Menteri ba Opis Premier Sarawak (Penyeraris Projek ungkup Agensi Pemansang Kandang Menua, Dewan Bandaraya Kuching Utara enggau Pekara Islam) Datuk Dr Abdul Rahman Junaidi, Sapit  Menteri Utiliti enggau Telekomunikasyen Sarawak (Sarawak Energy Berhad enggau PETROS) Dato Ibrahim Baki, Sapit Menteri Infrastruktur enggau Pemansang Penyangkai Kapal Sarawak Datuk Ir Aidel Lariwoo, Sapit Menteri Nembiak, Lumba enggau Pemansang Orang Dagang Sarawak Datuk Dr Ripin Lamat, Sapit Menteri ba Opis Premier Sarawak (Integriti enggau Ombudsman) Datuk Dr Juanda Jaya, Sapit Menteri ba Opis Premier Sarawak (Pengereja Kasar, Imigresen enggau Patau Projek) Datuk Gerawat Gala, Sapit Menteri ba Opis Premier Sarawak (Undang-undang enggau Adat Bumiputera) Datuk Jefferson Jamit Unyat, Sapit Menteri Digital Datuk Wilson Ugak Kumbong enggau Tuai Pegawai Eksekutif RECODA Datuk Ismawi Ismuni. -EDISI UKAS