MARUDI: Projek ngaga jalai baru Miri ke Marudi ti ditaga belabuh Jun tu dikumbai nyadi pugu penyungkak pemansang ekonomi enggau pemansang kandang menua ulu Baram.
 
Sapit Menteri Pengerai Mensia Mayuh, Pengawa Berumah enggau Perintah Lokal Sarawak ti nyadi Kaban Kunsil Nengeri (ADUN) Marudi, Datuk Dr Penguang Manggil madah, infrastruktur moden nyan ukai semina deka ngemuntangka jalai penyambung, tang mega ngerandang peluang ekonomi ti sedandang agi ngagai raban orang dagang lokal.
 
"Marudi bisi pengulih besai ba pengawa dagang. Ari rentayan jalai alun ti meruan agi, kitai melaba mayuh agi aktiviti ekonomi ulih dikereja peranak dia, kelebih agi orang dagang Bumiputera,” ku iya.
 
Iya bejaku munyi nya lebuh bejadila Pengerami Ramah Tamah Aidilfitri enggau Forum Orang Dagang diatur Balai Dagang Bumiputera Sarawak (DUBS) Pampang Marudi di Dewan Suarah Marudi, kena Hari Enam.
 
Datuk Dr Penguang mega muji pengeregas DUBS Pampang Marudi ti nyadi entara pamoang pemadu progresif di Sarawak.
 
Iya nyemetak madah, orang dagang nyengkaum rebak biak, patut ngerebut peluang ti disediaka perintah nengah bemacham program enggau bantu.
 
Ngenang pekara bukai, Datuk Dr Penguang bisi madah ke Regata Baram disadang diatur baru ujung taun tu.
 
Ku iya, nya disadang ngerichahka agi aktiviti dagang temuai enggau ekonomi di sitak menua ulu.
 
Pengerami nya mega diatur serimbai Aum Besai Ninting Taun DUBS Marudi Ke-3 ti mujur ngempuru lebih 60 nyengkaum kaban DUBS enggau komuniti dia.
 
Sama datai Chairman DUBS Pampang Marudi Mujan Lah, pengari Pegawai Pelilih Marudi Fazzwan Yunus, Sekretari Besai DUBS Sarawak Jezamine Dior, Sekretari Eksekutif DUBS Sarawak Sabini Abang sereta Tuai Polis Pelilih Marudi DSP Nor Aizan Mohamad Jamil. -EDISI UKAS