MIRI: Ekspo Negap Nembiak Pribumi Miri 2025 diatur Serakup Intelektual Pribumi Sarawak (PERANTIS) enggau kerejasama Forum Kaban Parlimen Menua Asia Senentang Populasyen enggau Pemeruan (AFPPD), Opis Pemansang Pengelandik Kandang Menua Sarawak sereta Palan Servis Rayat Parlimen Miri di Stadium Bandaraya Miri, ditu kena Hari Enam chukup richah.
Menteri Kereja Raya ti nyadi Chairman AFPPD Malaysia, Dato Sri Alexander Nanta Linggi madah, pengawa ngatur ekspo nya setipak enggau Model Pemansang Nembiak Madani 2030 ti meri perati ngagai pemansang meruan enggau iklusif ba bala nembiak nengah bemacham inisiatif baka bengkel pengawa dagang, seni kulinari, literasyen pekara wang, pekit e-lumba, sanding penemu kereja enggau pelajar.
Berindik ari nya, iya nyemetak madah ke pangku pengawa nembiak besai endar nyadi agen ngubah diatu enggau dudi hari, kelebih agi ba kandang menua pesisir enggau dalam komuniti orang asal.
“Pengawa ngatur ekspo tu mandangka sinergi entara sektor perintah, kompeni enggau komuniti ngenegapka raban nembiak Sarawak, lalu ngerandang peluang nuju pengidup menyana agi dudi hari ari sukut pelajar, kereja enggau pemansang ekonomi," ku iya lebuh bejadika ekspo nya.
Nambah ke nya, Dato Sri Alexander muji pengawa begempung semua raban ti ngemujurka ekspo nya, nyengkaum institusyen pelajar tinggi, agensi perintah enggau gerempung komuniti sivil, ti ku penemu iya nunjukka sida bela ransing nuju pemansang nembiak ti nyerangkung semua.
Iya mega mantangka penemu pemesai guna pelasar baka nya mai sada enggau aspirasyen nembiak lokal, ngambi sida ukai semina nyadi penerima pemaik aja, tang mega nyadi orang ti ngubah ba renggat baruh.
Ekspo ti diatur sehari nyentuk nya ngempuru lebih 200 penyereta e-lumba, 180 pelatih seni kulinari sereta bemacham Pelajar enggau Latih Teknikal enggau Vokasional (TVET) nyengkaum Institusyen Pelajar Tinggi (IPT).
Sama datai Kaban Parlimen Miri ti nyadi Tuai Kluster Nembiak AFPPD Malaysia Chiew Choon Man, Kaban Parlimen Kapar ti nyadi Tuai Kluster Pemansang Indu AFPPD Malaysia Dr. Halimah Ali, Residen Bagi Menua Miri Galong Luang, Penghulu Wilson Mac, Presiden PERANTIS Spancer Biondy Raymond Ramba seerta Chairman Ekspo Negap Nembiak Pribumi Miri 2025 Dr. Alpha Ngadan. -EDISI UKAS
