KUALA LUMPUR: Yang di-Pertua Negeri Sarawak, Tun Pehin Sri Dr. Wan Junaidi Tuanku Jaafar begulai enggau bini, Toh Puan Datuk Patinggi Fauziah Mohd Sanusi, udah ngerami Pengerami Ngintu Hari Raya Aidilfitri 2025 enggau diri sebilik sereta bala bakih ba siti hotel tebilang di indu nengeri, kena Hari Empat tu tadi.
 
Pengerami nya digulu lebih 200 pengabang, nyengkaum sida sebilik, bala bakih, tokoh korporat, orang dagang enggau pegawai kanan perintah. Sida begelumu ngerami Syawal enggau ati lantang sereta penuh pengaga.
 
Entara bala pemesai ti sama datai Tengku Syarif Laksamana Perlis Dato' Sri Diraja Syed Razlan Almarhum Tuanku Syed Putra Jamalullail, ex-luyar menua Tan Sri Dato' Sri Mohamed Apandi Ali enggau bini, Puan Sri Datin Sri Faridah Begum K.A. Abdul Kader, sereta ex- Yang di-Pertua Dewan Rakyat, Tan Sri Datuk Azhar Harun enggau bini, Puan Sri Simla Bibi Abdul Ghani.
 
Kelimpah ari nya, ex-Tuai Pegawai Eksekutif Khazanah Nasional, Tan Sri Datuk Wira Azman Mokhtar enggau bini, Puan Sri Datin Wira Mastura Abd. Rahman, enggau Chairman AIS International School, Profesor Dr. Mahmoud Khalid Al Msafir sereta bini, Datin Amani Majid Al Taha bela datai ngerichah pengerami nya.
 
Nyadi sebagi ari tradisyen Aidilfitri, Tun Pehin Sri Dr. Wan Junaidi enggau Toh Puan Datuk Patinggi Fauziah bisi nyua duit raya ngagai nembiak mit, sereta ngelimpangka awak berandau sereta nanya berita bala ti bisi datai.
 
Tun Pehin Sri Dr. Wan Junaidi ngena awak nya meri terima kasih ke penatai semua pengabang enggau ngarap ke pengerami nya ulih ngerapitka kaul sereta narak semangat penyerakup.
 
Pengerami nya tembu enggau richah, makai serumpu enggau begambar, ngasuh Aidilfitri sekali tu nyadi kenang manis ngagai semua ke datai. –EDISI UKAS