KUCHING: Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg ngabang Raya ke rumah Sapit Menteri Perambu Mengeri, Pengatur Tanah enggau Rampa Menua, Datuk Len Talif Salleh ditu, Hari Empat.
 
Penatai iya urung pukul 12.30 tengah hari disambut Datuk Len Talif enggau bini, Datin Asiah Awai.
 
Pejalai ngabang Datuk Patinggi Abang Zohari dipun enggau pengawa begambar begulai enggau diri sebilik, sebedau ditampung enggau besilih tepa.
 
Nyempulang iya ngabang sehari nya Menteri Dagang Temuai, Industri Kreatif enggau Seni Pemerindang Sarawak ti mega Menteri Nembiak, Lumba enggau Pemansang Orang Dagang Sarawak Dato Sri Abdul Karim Rahman Hamzah.
 
Datuk Patinggi Abang Zohari ditaga nampung pengawa ngabang Hari Raya Aidilfitri 2025 ke rumah Tuai Sekretari Politik Premier Sarawak ti mega Kaban Kunsil Nengeri (ADUN) Tupong Dato Fazzrudin Abdul Rahman muak ke lemai tu. -EDISI UKAS