SARIKEI: Peranak Pasar Jakar diatur ulih matak seput lantang pengudah perintah deka ngaga Pusin P (P –Turn) nyadi alternatif entukar nyamai mindah ari endur nya ke pasar Sarikei.
Sapit Premier Sarawak, Datuk Amar Douglas Uggah Embas madah, sebedau tu Kaban Parlimen Sarikei, Dato’ Sri Huang Tiong Sii minta lampu trafik digaga dia ngambi peranak nyamai nurun ke pasar Sarikei ketegal P-Turn ke bisi kelalu jauh.
“Sebedau tu, peranak mantah laban P-Turn nya kelalu jauh. Tang sekali tu, kitai ngaga P-Turn baru ti semina 500 meter ari simpang Pasar Jakar.
“Aku ngarap ke kereja ngaduka projek tu ulih tembu seretai pengudah semua jalai tu ulih ditengah, disadang April tu,” ku iya ngagai media pengudah ngatur pejalai gawa ke taba projek Pan Borneo Jakar ditu, kena Hari Enam.
Nambah ke nya ku Datuk Amar Douglas, Opis Menteri Kereja Raya (KKR) berati ke perambu ngaga lampu trafik dia enda engkeman.
Berebak enggau nya, iya mega minta projek ngaga jalai Pan Borneo Jakar dirumban ngambi semua jalai nya ulih ditengah mensia mayuh.
“Aku dipadah, sebagi ari jalai dua besundang tu deka ulih ditengah kena 25 Mac iya nya sebedau ngintu Hari Raya Aidilfitri, seraya ke bukai nya April ila,” ku iya.
Nangkan nya, ketegal gaya hari tusah deka disadang kandang diatu, iya minta semua pengatur penyangga penusah di renggat bagi menua seruran nyikap diri napi sebarang utai tau nyadi nyengkaum penusah bah.
“Kitai enda ulih empelita laban bah tau nyadi sebarang maya, lebih agi maya gaya hari diatu enda tentu enggau ujan bangat suah nyadi ngenyit.
“Nya alai, aku minta semua palan operasyen enggau pengatur penyangga penusah sedia tumu enggau nentuka semua kereban, logistik enggau orang gawa udah disikap,” ku iya ti mega Chairman Penyangga Penusah Nengeri Sarawak (JPBNS).
Ngenang pasal penusah bah ti benung nuntung sekeda bagi menua di Sarawak diatu, iya madah ke penusah di Jematan Durin nya keterubah nyadi.
Sama datai Sapit Menteri Pengeraja Asal enggau Pemeruan Rampa Menua Dato' Sri Huang Tiong Sii, Kaban Kunsil Nengeri (ADUN) Pakan Tan Sri William Mawan Ikom, Residen Bagi Menua Sarikei Datu Michael Ronnie Langgong enggau Sapit Residen Bagi Menua Sarikei Badjuri Bidin. - EDISI UKAS
