SELANGAU:  Sapit Premier Sarawak, Datuk Amar Douglas Uggah Embas udah ngatur pejalai gawa ke Palan Pengenduh Sementara (PPS) Balai Mayuhguna Selangau kena Hari Enam enggau tuju ngabas raban tasah bah ti diau ngenduh dia.
 
Iya ti mega Chairman Komiti Penyangga Penusah Nengeri (JPBN) Sarawak bela nyuaka pemeri utai diguna ngagai sida ke tasah bah nya.
 
Ba pejalai nya, iya udah mendingka penerang ari raban APM Selangau diari ke Lt.Luke Douglas Dongun.
 
PPS Balai Mayuhguna Selangau ti dibuka kenyau ari 7.30 malam, kemari udah endur 28 lelaki besai tuai, 31 indu besai tuai, 10 nembiak mit lelaki, enggau 15 nembiak mit indu sereta siku anak mit lelaki enggau lima da anak mit indu, siku indu timpang pendiau (OKU), 10 orang tuai lelaki enggau 15 orang tuai indu.
 
Lebih 100 raban tasah bah ari empat rumah panjai di kandang ngelingi Selangau udah diasuh diau di PPS Balai Mayuhguna Selangau sehari tu.
 
Komiti Penyangga Penusah Pelilih Selangau madah, bisi 35 iku tasah ngaul 12 ruang bilik ari Rumah Nyarapong seraya Rumah Magdeline ngaul 14 iku, dua ruang bilik.
 
Kelimpah ari nya, Rumah Awa ngaul 52 iku enggau 16 ruang bilik sereta Rumah Ambrose bisi 15 iku enggau dua ruang bilik.
 
Sama datai ba pejalai nya Kaban Parlimen Selangau Edwin Banta, Residen Bagi Menua Sibu Abang Mohamad Porkan Abang Budiman, Pegawai Pelilih Selangau Yalin Asan sereta bala bukai. - EDISI UKAS