KUALA LUMPUR: Sepenyampau 475 nembiak Sarawak ti belajar di Semenanjung Malaysia udah nerima pemeri Aidilfitri ari Yayasan Sarawak, ba Pengerami Sungkei Anak Sarawak 2025 ti diatur di Palan Konvensyen Kuala Lumpur (KLCC) kena Hari Enam.
Ari penyampau nya, bisi 392 penerima ti belajar ba Palan Pelajar Tinggi (IPT), 36 iku di baruh Program Besilih Nembiak Yayasan Sarawak, tujuh anak bala staf Yayasan Sarawak nyengkaum 40 anak staf Rumah Sarawak Kuala Lumpur.
Pemeri duit raya enggau pemakai nya disua Yang di-Pertua Negeri Sarawak, Tun Pehin Sri Dr Wan Junaidi Tuanku Jaafar sereta bini, Toh Puan Datuk Patinggi Fauziah Mohd Sanusi, seraya disempulang Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg enggau bini Puan Sri Datuk Amar Juma'ani Tun Tuanku Bujang.
Sama datai Sapit Menteri Besai Malaysia Dato’ Sri Fadillah Yusof, Yang Di-Pertua Dewan Negara Senator Dato Awang Bemee Awang Ali Basah, Sapit Premier Sarawak Datuk Amar Profesor Dr. Sim Kui Hian sereta Speaker Kunsil Nengeri (DUN) Sarawak Tan Sri Datuk Amar Mohamad Asfia Awang Nasar.
Berebak enggau nya, bala nembiak mega udah dipadahka sida tau nganjung peminta laptop pechuma sereta bantu bucha bup nengah website Yayasan Sarawak, ti deka dibuka belabuh 23 Mac nyentuk 30 April tu.
Peminta nya khas ngagai semua nembiak Sarawak ti belajar di Palan Pelajar Tinggi Perintah (IPTA) enggau Palan Pelajar Tinggi Luar (IPTS).
Pengerami diatur Yayasan Sarawak enggau kerejasama Opis Kaul Sarawak Kuala Lumpur enggau Sarawak Volunteers nya richah agi enggau penatai lebih 2,000 pengabang, datai ari peranak Sarawak ti gawa di Semenanjung Malaysia enggau bala bakih strategik perintah.
Bela datai bala Menteri Perintah Besai enggau Sarawak, Sekretari Perintah Sarawak Datuk Amar Mohamad Abu Bakar Marzuki, bala Sapit Menteri Perintah Besai enggau Sarawak, Direktor Yayasan Sarawak Datu Mersal Abang Rosli sereta bala temuai dipebasa ke bukai.
Pengerami diujung enggau sembiang Isyak sereta Tarawih bebala mayuh, sebedau makai moreh ti udah disedia. -EDISI UKAS
