SIMANGGANG: Bala kunteriktor ditangkan nentuka projek dipejalai di Simanggang tembu dalam timpuh ditetap.
 
Sapit Menteri Pelajar, Inovasyen enggau Pemansang Penau Sarawak, Datuk Francis Harden Hollis nibar ke jaku tangkan nya lebuh ngatur pejalai ngabas sekeda projek ti udah dikemendar di sitak Simanggang kena Hari Enam tu tadi.
 
Entara projek ti diabas iya nya ngaga jalai tama ke taba baru Rumah Thomas Barau di Kampung Genting San, Undop, di baruh Program Transformasyen Menua Pesisir (RTP).
 
Projek nya disadang tembu dalam timpuh enam bulan, enggau Opis Kereja Raya (JKR) Bagi Menua Sri Aman nyadi agensi bejalaika pengawa ti ngesan tanggungpengawa nembuka projek nya bulan Julai taun tu.
 
Kelimpah ari nya, iya mega ngabas taba Rumah Japing Gema di Kampung Nyakai, Jalai Paip, Undop.
 
Iya meda pejalai projek nya lubah lalu ngansak peranak dia meri kerejasama ngambi ngerumban pengawa.
 
Pejalai iya terus ngagai taba projek nyeleti Balai Mayuhguna Surau Darul Hasanah di Kampung Harmoni, Sri Aman, ti benung diseleti bala pengereja nentuka projek tembu chun ba timpuh.
 
Iya mega limpang ngabas pengawa ngaga entepan kerita baru di Balai Mayuhguna Kampung Muhibbah, ti diatu benung digaga.
 
Datuk Francis nyemetak madah ke tetiap kunteriktor ti dipadu gawa patut nitih ke taga ti ditetapka enggau nyaga integriti enggau disiplin nembuka projek chun ba timpuh.
 
Iya minta peranak meri kerejasama ngagai kunteriktor nentuka nadai sebarang utai nekul projek. - EDISI UKAS