SIBU: Program Lan Berambeh Sungkei 2025 nurai sejarah nyadi edisi pemadu richah enggai penatai lebih 20,000 iku, ngelui ari terubah disadang.
 
Dataran Tun Tuanku Bujang Fasa 1 nyadi saksi baka ni program buka puasa nya ukai semina program pengarap aja, tang lambang penyerakup pupu bansa di Sibu enggau sitak ngelingi nya.
 
Sapit Menteri Pelajar, Inovasyen enggau Pemansang Penau Sarawak ti nyadi Kaban Kunsil Nengeri (ADUN) Nangka, Datuk Dr. Annuar Rapa’ee madah ke pengagit iya meda pengerichah program sekali ti.
 
“Terubah, kami melaba urung 20,000 iku datai, tang penyampau ke bendar mayuh agi, nyengkaum ari Bintangor, Semop, Kuala Rajang enggau Tanjung Manis.
 
“Penatai komuniti pupu bansa ti sama buka puasa beserumpu nunjukka pengelantang enggau segulai ti dikemeran kitai ngelama tu,” ku iya.
 
Program ninting taun nya ukai semina ngenah pemakai buka chara ‘potluck’, tang mega narit ati nengah pekit bedil buluh, selawat, bedil, 'teter' beduk sereta pemerindang nasyid enggau qasidah.
 
Datuk Dr. Annuar mega bekunsi penyelai program taun tu, baka mayuh sida ti datai ngerasuk pekayan asal baka Melayu enggau tengkolok, kelimpah penatai pengari Kaban Komiti (AJK) pengarap bukai sama buka puasa.
 
Program nya diatur Komiti Mendam Pengerami Islam Bagi Menua Sibu & Palan Servis DUN Nangka enggau sukung bemacham agensi perintah nentuka program lanchar.
 
Sama datai Menteri Penyerakup Bansa Dato’ Sri Aaron Ago Dagang, ADUN Ngemah Anyi Jana, Tuai Sekretari Opis Menteri Penyerakup Bansa Mohamad Sobri Mat Daud sereta bala tuai lokal ke bukai.-EDISI UKAS