BAU: Projek nyeleti sistem parit padang bol Sekula Sekondari (SMK) Singai diatu udah tembu menyana.
 
Sapit Menteri Pengangkut Sarawak (Sungai enggau Tasik) Dato Henry Harry Jinep bisi datai bejadika pengawa nyerah projek nya kena Hari Enam.
 
Projek beungkus RM1,200,000 nya ngena agih belanja Program Transformasyen Menua Pesisir (RTP) sitak Kunsil Nengeri (DUN) Tasik Biru Taun 2024.
 
Dulu ari nya, Kaban Kunsil Nengeri (ADUN) Tasik Biru nya udah bejadika aum besai ninting taun Serakup Apai Indai enggau Pengajar (PIBG) sekula nya ti mega digulu Sapit Direktor Sektor Pengatur Pengawa, Opis Pelajar Nengeri Sarawak (JPNS).
 
Berebak enggau nya, iya mega ngemendarka agih belanja sepenyampau RM30,000 ngena Projek Pemansang Mit Menua Pesisir (MRP) Taun 2025 ngagai raban sekula enggau tuju meli kereban ngajar enggau belajar sereta akademik. -EDISI UKAS