SERIAN: Kaban Serakup Sino Dayak Sarawak dipinta terus ngetan kaul manah enggau semua bansa di Sarawak.
 
Sapit Menteri Pemansang Infrastruktur enggau Penyangkai Kapal Sarawak, Dato Majang Renggi madah, penyerakup enggau penegap politik ti diasai begulai ngelama tu patut dijaga ngambi mansang ba semua pengawa dikereja manggai taun 2030.
 
“Komuniti Sino Dayak Sarawak ti udah rejista enggau Opis Pengerejista Gerempung Malaysia (ROS) pengelama semilan taun nya patut ba jalai ti betul enggau nipak ke tuju ditumbuh.
 
“Belalauka tuju serakup ditumbuh, dikearap Komuniti Sino Dayak ulih maju segulai sejalai enggau bansa bukai.
 
“Komuniti Sino Dayak patut nanggam kaul manah enggau tetiap agensi perintah tauka parti megai perintah baka Gabungan Parti Sarawak (GPS),” ku iya lebuh bejaku ba Pengerami Genap Taun Ke-9 Pengawa Numbuh Serakup Sino Dayak Sarawak di Balai Komuniti Serian kena Hari Enam.
 
Dato Majang madah baru, kaul manah enggau kerejasama entara komuniti di selampur Sarawak tentu deka meri penguntung enggau pengelantang ngagai rayat kelebih agi di menua semak mengeri.
 
Iya madah, komuniti Sino Dayak enti deka ngasai pemansang enggau pengidup ti menyana patut berubah negika pengawa bulih pelajar ti meruan baka bansa bukai.
 
“Nya alai, genap kaban patut bejalaika pangku pengawa enggau ransing negika pengawa serakup ungkup pengelantang Komuniti Sino Dayak Sarawak,” ku iya.
 
Ba pengerami nya, Kaban Kunsil Nengeri (ADUN) Samalaju nya mega ngemendarka agih belanja Projek Pemansang Mit Menua Pesisir (MRP) sepenyampau RM20,000 ungkup taun 2025 ngagai Serakup Sino Dayak Sarawak ngatur akiviti sepanjai taun. -EDISI UKAS