KANOWIT: Rumah Panjai Bibi, Batu Luking, Majau richah berami enggau semangat begulai serimbai Ngintu Hari Indu diatur JKKK rumah panjai nya ngaul 80 iku ti datai ngerami orang indu ti nyadi tulang belakang ruang bilik enggau komuniti.
 
Pengerami nya richah agi enggau penatai Sekretari Politik Menteri Penyerakup Bansa, Dr. Stephen William, ti ngari ke Menteri Penyerakup Bansa ti mega Kaban Parlimen Kanowit, Dato Sri Aaron Ago Dagang empai lama.
 
Lebuh bejaku ba mua mayuh, Dr. Stephen meri tabi puji ngagai raban pengatur, lebih agi Gerempung JKKK Rh Bibi ti udah ngatur pengawa ti chukup besai reti nya.
 
Utai ke narit ati, penatai tiga Tuai Rumah indu ke program nya nunjukka orang indu diatu majak pegari nyadi tuai komuniti, mandangka orang indu ukai semina ngintu pengawa di rumah aja, tang ulih mai ubah ba atur pengawa renggat baruh.
 
Kelimpah ari nya, sekeda isu enggau peminta projek ti dibantai sepanjai program nya mega nerima perati.
 
Dr. Stephen meri jamin iya deka madah ke pekara nya ngagai Menteri Penyerakup Bansa ngambi pengawa ulih diadu.
 
Sama datai Ex-Penghulu Ron Ugai, TR. Arun Unchat enggau pengari Raban Indu PRS Pampang Machan.-EDISI UKAS