KUCHING: Yang di-Pertua Negeri Sarawak, Tun Pehin Sri Dr. Wan Junaidi Tuanku Jaafar enggau bini, Toh Puan Datuk Patinggi Fauziah Mohd Sanusi disadang ngulu Majlis Keman Kaul kena 27 April tu di Mukah.
 
Pia ku Kaban Kunsil Nengeri (ADUN) Balingian, Abdul Yakub Arbi ti mega Presiden Serakup Melanau enggau Komiti Besai Kaul Mukah 2025.
 
Dulu ari nya, iya disempulang bala kaban Komiti Besai Kaul Mukah 2025 udah ngatur penemuai basa ngagai Tun Pehin Sri Dr Wan Junaidi di rumah iya di Kasuma Resort, kena Hari Satu.
 
Ku Abdul Yakub, pengawa ngangauka Tun Pehin Sri Dr. Wan Junaidi enggau Toh Puan Datuk Patinggi Fauziah nya kelai basa enggau ngenegapka kaul bala tuai nengeri ba pengawa ngintu adat enggau budaya komuniti Melanau.
 
Pesta Kaul Mukah 2025 deka diatur ari 19 nyentuk 27 April di Pantai Kala Dana, Mukah enggau bemacham program main asal baka Perarakan Serahang, Pekit Tibou, pemandang main asal enggau kraf jari sereta pemerindang tradisional.
 
Kelimpah ari nya, penemuai nya mega berandauka pengawa ngenegapka budaya, pelajar enggau ekonomi di Mukah lalu Tun Pehin Sri Dr. Wan Junaidi meri sanding penemu pasal pengawa ti ulih dikereja dikena ngenegapka pemansang di sitak nya.
 
Sama datai ba penemuai basa nya ADUN Tellian, Royston Valentine, Residen Bagi Menua Mukah, Datu Kueh Lei Poh, Pegawai Pekilih Mukah, Peleadzman Ahip enggau bala bukai.-EDISI UKAS