MIRI: Pengerami Gempuru Makai Lemai KMKK Iban Begulai enggau Tuan Residen Miri ti diatur kena Hari Minggu mujur ngempuruka lebih 150 tuai raban bansa Iban di Bagi Menua Miri.
 
Batang tuju pengerami ti diatur Tuai Raban Bansa enggau Tuai Komuniti (KMKK) Iban Bagi Menua Miri nya mai bekelala enggau Residen Bagi Menua Miri ti baru, Galong Luang, sereta ngerapitka kaul entara bala tuai komuniti enggau raban administrasyen.
 
Ngari ke KMKK Iban Bagi Menua Miri, Pemancha Alexander Isut Karin lebuh bejaku ngelalu penatai temuai dipebasa nyengkaum Sapit Menteri Pengerai Mensia Mayuh, Pengawa Berumah enggau Perintah Lokal Sarawak, Datuk Dr Penguang Manggil.
 
Iya nyemetak madah ke pemesai reti pengerami baka nya dikena ngenegapka agi kerejasama entara KMKK enggau raban perintah.
 
Seraya Residen Bagi Menua Miri Galong Luang meri terima kasih ngagai KMKK ti udah kiruh ngatur pengerami nya enggau bekunsi peneleba diri gawa di Miri kenyau ari 2004 sebedau pulai baru nyadi Residen bulan Januari tu tadi.
 
Iya meransang raban KMKK terus bekerejasama enggau opis sereta agensi perintah ba pengawa mutar penanggul rayat sereta nentuka penerang datai ba renggat baruh.
 
Datuk Dr Penguang Manggil lebuh bejaku mega meri tabi puji ngagai raban pengatur sereta madah ke pemesai guna pengawa milih tuai raban bansa ti nerima sukung rayat.
 
Iya mega ngingatka tatak umur tuai raban bansa diatu ditetapka 75 taun seraya madah ke bala tuai raban bansa patut nemu IT ngambi tetangkupka pangku pengawa sida kemaya hari.
 
Ngenang pekara bukai, iya mega minta KMKK meri timbal penemu pasal chalun ti patut ngisi pengawa nyadi Temenggong Iban Bagi Menua Miri ti diatu puang.-EDISI UKAS