OPAR: Kaban Kunsil Nengeri (ADUN) Opar, Billy Sujang ngemataka pengawa nyerah empat iti projek di baruh Program Transformasyen Menua Pesisir (RTP) ti udah tembu sereta dua iti da projek agi digaga kena pagi Hari Empat.
 
Ungkus kesemua enam projek nya sepenyampau RM760,000.
 
Empat projek ti udah tembu iya nya projek nyeleti Rumah Adat Lama Kampung Stungkor Lama, nyeleti Dewan Kampung Bokah, ngaga baru Dewan Serbaguna Kampung Sebandi Hilir enggau nyeleti Rumah Adat Kampung Perian.
 
Seraya dua iti da projek ti agi digaga iya nya projek nyeleti Balai Raya Kampung Serayan Hilir enggau nyeleti Dewan Serbaguna Kampung Serayan Baru.
 
Lebuh bejaku, Billy madah ke sekeda projek nya agi begunaka renggat kedua laban agih belanja enda chukup dalam peminta sereta ngaga renggat keterubah.
 
Iya mega mada ke pengawa ngaga renggat kedua Dewan Serbaguna Kampung Sebandi Hilir deka ditampung di baruh RTP Taun 2025 ngena tambah agih belanja sepenyampau RM200,000.
 
Sama datai ba pengawa nyerah enggau pejalai gawa nya Sekretari Politik Premier Sarawak Niponi Undek sereta pengari ari Opis Kereja Raya (JKR) Pelilih Lundu. -EDISI UKAS