KUCHING: Sarawak Energy Berhad (SEB) ngelancharka Sistem Nyimpan Kuasa Bateri (BESS) beskala utiliti keterubah di Malaysia ti ditumbuh di Stesyen Janakuasa Sejingkat, Kuching.
 
Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, BESS bekapasiti 60 Megawatt (MW) nya udah diaktif dalam bulan Disember 2024 lalu bejalaika pangku pengawa besai nambahka penyikar sistem grid kuasa di Sarawak.
 
“Tu keterubah di Malaysia, lalu enti tu mujur engka kitai ulih numbuhka BESS ba endur ke bukai, laban tu siti kereban ti nyamai dipindah.
 
“Nya alai aku enggau bala bakih berunding tu ulih nyukupka pengawa bekenaka kuasa tauka nangkup peminta kuasa ti tegap agi di kandang menua pesisir,” ku iya.
 
Iya nyebut jaku nya ba aum media pengudah tembu ngatur pejalai gawa ke BESS di Sejingkat Power Corporation (SPC) kena Hari Lima.
 
Datuk Patinggi Abang Zohari madah baru, sistem tu ngasuh integrasyen pemansut kuasa ulih dikena baru baka solar, seriris enggau aspirasyen Sarawak nyapai status ekonomi bepenatai pemisi tinggi manggai 2030 di baruh Strategi Pemansang Pengudah COVID-19 (PCDS) 2030.
 
“Sarawak Energy Berhad udah melanja RM128 juta ungkup 22 kontena ti ngundan mayuh bateri.
 
“Tang ba aku, prinsip ke alai kitai ulih ngena kuasa chara baru nengah bateri lalu tu siti ari teknologi chara dunya baru di Malaysia,” terang iya.
 
Premier Sarawak nerang, BESS dikena nyimpan kuasa maya tasah enggau mantu nyaga voltan sereta frekuensyen grid.
 
Stesyen Janakuasa Sejingkat, ti bekapasiti 150MW nyadi loji jana kuasa arang batu keterubah di Borneo sereta kedua di Malaysia, diatu dalam proses belidar belubah nuju pemansut kuasa ti beresi agi.
 
Pengawa tu nunjukka pengeran SEB ba pemeruan rampa menua enggau ngurangka karbon dilepas.
 
Sama datai Menteri Utiliti enggau Telekomunikasyen Sarawak, Dato Sri Julaihi Narawi, Sekretari Perintah Sarawak Datuk Amar Mohamad Abu Bakar Marzuki, Sapit Menteri Utiliti enggau Telekomunikasyen Sarawak, Datuk Dr Abdul Rahman Junaidi, Sapit Menteri Kuasa enggau Pemeruan Rampa Menua Sarawak, Datuk Dr Hazland Abang Hipni, Chairman SEB Dato Ibrahim Baki, Tuai Pegawai Eksekutif Kumpulan SEB Datuk Sharbini Suhaili sereta bala tuai opis ke bukai.-EDISI UKAS