BARAM: Sapit Premier Sarawak, Datuk Amar Douglas Uggah Embas sehari tu nembuka pejalai hari keterubah Ekspedisyen Bario pengudah nujah jalai darat penyauh 256 kilometer (km) ari Miri ke menua ulu Baram.
 
Iya begulai enggau delegit ari Opis Kereja Raya (JKR) Sarawak bemalam ba Homestay Segah Selaan ditu kelai pengeran Perintah Sarawak bejalai gawa enggau meda empu gaya infrastruktur ba menua pesisir.
 
Ekspedisyen meri perati ngagai jalai batang lama enggau jalai batang ti agi ditengah ti nyadi jalai penyambung komuniti menua ulu.
 
Ku iya, siti chara baru dikena ngintu jalai menua pesisir deka dipejalai ujung taun tu enggau berati ke pekara pengelikun enggau ulih ditengah.
 
Berebak enggau nya, iya mega madah ke Jematan Sungai Sengayan ti tekerap deka digaga baru, seraya Jematan Long San deka diseleti enda lama da.
 
Sepenyampau 27 jematan bukai ba sitak Baram mega dikelala ngambi ke diintu.
 
Dulu ari nya, bela diatur randau begulai enggau Tuai Raban Bansa enggau Tuai Komuniti (KMKK) dikena ngulihka timbal penemu terus ari komuniti senentang infrastruktur diguna sereta pekara pengelantang sida.
 
Datuk Amar Douglas Uggah mega meri terima kasih ngagai bala pegawai JKR Sarawak ti sama enggau Ekspedisen nya lalu sanggup nujah pejalai ti mar nentuka pengawa nyerenih infrastruktur ulih digaga serap enggau nemban.
 
Ekspedisyen nya deka ditampung baru pagi ke Bario, enggau ngabas sambung jalai sereta program randau begulai enggau peranak din.
 
Bela nyempulang iya, Sapit Menteri ba Opis Premier Sarawak (Pengereja Kasar, Imigresyen enggau Patau Projek) Datuk Gerawat Gala, Kaban Parlimen Baram, Dato Anyi Ngau, ADUN Telang Usan, Dato Dennis Ngau, Residen Bagi Menua Miri, Galong Luang sereta Direktor JKR Sarawak, Ir. Ts. Gs. Br. PMr. Dr. Cassidy Morris.-EDISI UKAS

Sumber: Pampang Komunikasyen Korporat, JKR Sarawak