AUCKLAND: Malaysia terus nyingkang gah negapka diri ba makit antarabansa nengah lapan kompeni lokal ngambi bagi ba Fine Food New Zealand 2025, pemandang dagang pemakai pemadu besai ba rantau Oceania dua taun sekali di Auckland, New Zealand.
 
Malaysia betuai ke Opis Menteri Betanam Betupi enggau Jamin Bekal Pemakai (KPKM) taun tu enggau kerejasama Kaunsil Pekara Makit Betanam Betupi Perintah Besai (FAMA) nengah Pavilion Malaysia.
 
Entara kompeni ngambi bagi ngari ke bemacham segmen industri pemakai baka rian, produk ili berunai, sambal tau terus diempa (RTE), ai irup dalam tin, pemakai pengerai, asil berikan enggau produk nadai gluten.
 
Pesuruhjaya Tinggi Malaysia ke New Zealand, Mazita Marzuki lebuh bejaku bejadika Pavilion Malaysia nyemetak madah ke pengulih besai rantau Oceania nyadi makit baru ungkup produk Malaysia.
 
Ku iya, ari penyampau tubuh peranak ngelui ari 50 juta nyengkaum komuniti ASEAN, rantau tu ulih nyendiaka nalan ti entap ungkup kompeni lokal ngerembaika makit.
 
Iya mega madah, Sempekat Dagang Ngatika Diri Malaysia–New Zealand (MNZFTA) ti ditanggam kenyau ari 2010 mega ngasuh produk Malaysia nyamai tama ke makit nya.
 
Entara kompeni ti narit ati iya nya IANA Corporation Sdn. Bhd, siti nya aja pengari ari Sarawak, ti mandangka biskus nadai gluten digaga ari tepung mulung asil formulasyen begulai enggau CRAUN Research Sdn. Bhd.
 
Produk nya nerima timbal chukup manah ari bala pengusung, lebih agi bala pengedar enggau pengimport lokal ti tekait ati meda produk inovatif ngemeratka pengerai.
 
Pengawa bejadi Pavilion Malaysia mega richah enggau penatai Tuai Direktor FAMA, Abdul Rashid Bahri enggau Chairperson Komiti Pemansang Indu, Ruang Bilik, Pengintu Pengelantang Komuniti, Orang Dagang enggau Gerempung Kerejasama Nengeri Perak, Datuk Salbiah Mohamed.
 
Malaysia ti ngambi bagi ba pemandang tebilang nya mandangka pengeransing perintah enggau industri ngerembaika makit produk pemakai Malaysia ngagao makit global, seriris enggau juluk menua nambah eksport sektor agropemakai nengah pengawa ngambi bagi pemandang dagang besai empas.-EDISI UKAS