KUCHING: Insiatif ngintu pesaka kampung Sarawak terus ditegap nengah pengawa ngatur Bengkel Community-Based Conservation 2025 ti diatur ba Raia Hotel and Convention Centre, Kuching, kena Hari Satu.
 
Sepenyampau 66 penyereta datai ari komuniti ti ngaul diri ba projek International Tropical Timber Organization (ITTO) di Ulu Baram, Anap–Muput, Ulu Mukah, sereta komuniti ari sitak projek Ecological Fiscal Transfer (EFT) dipatau Unit Pekara Antarabansa, Opis Kampung Sarawak (JHS) udah ngulu bengkel nya.
 
Bengkel nya bekunsi ke penemu ari mayuh raban, nyengkaum pegawai JHS, Chairman Jagoi Heritage Association, Menijar KOPEL Kinabatangan, enggau Tuai Pengintu WWF-Malaysia.
 
Penatai sida mujur nambahka pemereti ati bala penyereta senentang chara konservasyen belalauka komuniti.
 
Lebuh bejaku bejadi bengkel. Direktor Kampung Sarawak, Datu Hamden Mohammad nyemetak madah ke komuniti patut sedia nerima enggau anang alah ajum penemu luar ti enda mereti ke gaya atur pengawa kampung ti nyata sereta undang-undang.
 
"Aku ngingatka komuniti patut pintar runding nentuka tunga kuing sida empu ungkup tanah, kampung enggau rebak dudi, kelimpah sedia nelebaka diri enggau arus pemansang,” ku iya ba siti penerang media.
 
Sekumbang bengkel nya, sekeda pengari komuniti bela bekunsi pemujur asil kerejasama sida enggau kompeni luar sereta perintah.
 
Entara sida nya, Tuai Rumah Jana ari Anap–Muput enggau Ulu Mukah nusui pemaik kerejasama enggau kompeni batang baka Zedtee Sdn. Bhd. ti mantu pemeruan kampung enggau pemansang ekonomi menua nya.
 
Seraya Daud Sedin ari Ba’ Data Bila bekunsika pemujur komuniti sida bulih mayuh perengkaguna pemun asil ari sukung kompeni luar enggau Perintah Sarawak.
 
Bengkel nya mega ngemata pengawa nyua tiga projek tembu ngagai komuniti ba Ulu Baram, iya nya ngaga Jalai Bedarat Long Lamam, Jalai Bedarat Lio Mato, enggau nyeleti Sistem Tekat Ai Bukit ba Ba’ Muboi ke alai semua projek nya tembu menyana dalam bulan April 2025 asil kerejasama JHS enggau ITTO.
 
Ku Datu Hamden. JHS ransing bejalaika inisiatif kampung sosial enggau pemansang komuniti, nyengkaum program latih komuniti, projek pemansang ekonomi alternatif ari asil kampung ukai kayu (NTFP), ngaku Community Representative Committee (CRC) sereta projek ngintu ekosistem nengah kaul komuniti dia.
 
“Ngena chara inklusif tu, komuniti ukai semina nerima pemaik aja, tang nyadi bakih strategik ba pengawa ngatur kampung ngena chara meruan," ku iya nyemetak.
 
Iya madah baru, bengkel ti diatur nya mandangka Perintah Sarawak terus ransing negapka komuniti nyadi bakih kunsi ba pengawa konservasyen kampung, seriris enggau chara Sustainable Forest Management (SFM) sereta juluk pemansang meruan kandang menua tu.-EDISI UKAS