MIRI: Unit Pekara Pengarap Bukai (UNIFOR) ngungkupka belanja RM400,000 dikena ngaga Gerija Baru BEM Long Panai.
 
Pemeri nya disua Sapit Menteri ba Opis Premier Sarawak (Pengereja Kasar, Imigresyen enggau Patau Projek), ti mega Kaban Kunsil Nengeri (ADUN) Mulu, Datuk Gerawat Gala lebuh ngulu Pengerami Hari Diri Sebilik Kampung Long Panai ti diatur ba Lakeside Ilham Centre ditu kena Hari Enam.
 
Iya madah, Perintah Sarawak naka ulih nentuka peminta enggau pengarap ba menua pesisir terus diberi perati.
 
“Pemeri tu sebagi ari pengawa seruran dipejalai perintah nengeri nentuka peminta enggau perengkaguna mensia mayuh ba kandang menua pesisir terus diberi perati,” ku iya lebuh bejaku ba mua mayuh rambau pengerami nya.
 
Iya mega mantang ke jaku senentang pemesai guna pemanah kaul dalam komuniti nadai ngira umur enggau asal penatai, sereta minta semangat segulai sejalai enggau beserakup terus dikedut ungkup pemansang genturung pendiau.
 
Hari Diri Sebilik Kampung Long Panai mega richah enggau bemacham aktiviti nyengkaum lumba rama, pemerindang main asal enggau makai serumpu.-EDISI UKAS