LIMBANG: Sepenyampau 81 orang tasah bah udah dipindah ke Palan Ngenduh (PPS) Dewan Medamit berindik ari gaya hari ti enda tentu di Pelilih Limbang.
 
Kaban Kunsil Nengeri (ADUN) Batu Danau, Dato Paulus Palu Gumbang udah ngabas bala ke tasah kena Hari Minggu sereta nentuka operasyen di PPS ti disedia lanchar.
 
Pejalai ngabas nya mega nyerangkung PPS Kampung Buluh Balui, Kampung Ukong enggau Dewan Medamit.
 
Iya disempulang Sapit Residen Bagi Menua Limbang, Marie Cotilla Louise @ Rozita Kulai enggau Pegawai Pelilih Limbang, Sulaiman Engal ti sama berati ke tikas pengawa besikap PPS napi sebarang utai ti tau nyadi.
 
Seraya PPS di Kampung Buluh Balui enggau Kampung Ukong agi semina besikap aja laban nadai orang diau ngenduh dia naka diatu.
 
Taja pia, Dewan Medamit diatu nyadi palan ngenduh ngagai sida ke tasah bah.
 
Bantu pemakai udah mansau enggau pemakai rangkai udah diberi ngagai sida ke tasah nengah Opis Pengintu Pengelantang Komuniti (JKM) Limbang dikena nentuka utai diguna sida chukup sekumbang diau ngenduh dia.
 
Pejalai ngabas nya nunjukka pengeran perintah nengeri nyeraris bantu sereta nentuka pengelantang orang tasah bah diberi perati, kelimpah nentuka PPS seruran sedia enti sema ujan majak nyadi enggau mayuh agi peranak ti patut dipindah.-EDISI UKAS