KUCHING: Sarawak terus nyulur ba pekit tenpin boling pengudah Nur Hazirah Ramli enggau Lavinia Jia Jie Kho bulih midul emas ba kededua pekit nya ke diatur di Megalanes Sarawak, Batu Kawa.

Nur Hazirah (21) siku atlit nasional, lalu Lavinia (19) udah mujur bulih midul emas pengudah menang ba pekit kategori beregu indu, negapka agi status elit sida ba pekit ba hari kedua.

Kededua atlit nya udah matak bala temuai enggau latih sida ke ngerikod 2,392 poin, Selangor ngerikod 2,271 lalu Johor ngerikod 2,183 poin.

Lebuh dirandau, atlit biak ari Sarawak nya berasai gaga enggau penyulut sida, kelebih agi Nur Hazirah ke dulu agi bulih midul emas ungkup kategori indu solo, ngujungka nya midul emas iya.

"Kami bisi siti main ke enda manah, tang kami angkat baru ba dua main ke penudi, Kami ngarap ulih semampai beretan ba penuduk pemadu atas. Taja pen mayuh penanggul tang kami naka ulih bepadan sereta ngulih midul emas," ku iya.

Berebak enggau nya, Livinia madah ke diri berasai gaga enggau asil nya.

"Aku meri terima kasih ngagai jurulatih enggau tim ke seruran meransang aku lebuh napi pemar maya bepekit.

Ungkup kategori lelaki beregu, tim Perak udah bulih emas enggau 2,479 poin, Melaka 2,459 puin enggau Pulai Pinang 2,389 poin.

Sama bisi datai ba pengawa nyuaka midul iya nya Sapit Premier Sarawak Datuk Amar Profesor Dr Sim Kui Hian enggau Sapit Menteri Nembiak, Lumba enggau Pemansang Orang Dagang Sarawak, Dato Gerald Rentap Jabu.

Pekit tenpin boling deka diatur kena Hari Enam ungkup kategori beregu beraban.-EDISI UKAS