KUCHING: Semua jalai ‘Redline’ ba sepemanjai Jalai Besai Pan Borneo deka diadu enggau manah. 

Menteri Kereja Raya Dato Sri Alexander Nanta Linggi madah, pengawa ngaduka jalai ‘Redline’ meseti digaga nitihka standard Jalai Besai Pan Borneo. 

"Kitai udah berandau pekara bekaul enggau Jalai Besai Pan Borneo. Sepemanjai Jalai Besai Pan Borneo mega bisi beberapa iti pakej tauka endur ke disebut kitai ‘Redline’.

"Jalai 'Redline' tu patut diadu laban udah jaki alai kitai berandau enggau Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg enggau Sapit Premier Sarawak Datuk Amar Douglas Uggah Embas ni bagi patut dikemeratka perintah nengeri dulu nyengkaum simpang 'Flyover' ke dilanggur ba Batu 8 ke ninting hari sekut," ku iya nerang.

Iya nerangka pekara nya maya dirandau media sepengudah betuaika Deligit Opis Menteri Kereja Raya (KKR) ngatur penemuai basa ngagai Premier Sarawak ba Wisma Bapa Malaysia ditu, kena hari dua.

Reti ‘Redline’ iya nya jalai asal ngelama tu sebedau Jalai Besai Pan Borneo digaga ba Kuching, Serian, Sibu, Bintulu, Julau enggau Miri.

Pemanjai jalai tu bisi 136.7 kilometer enda nyengkaum ke digaga nyadi Jalai Pan Borneo Sarawak ke diatu balat jai laban maya digaga suba enda nitihka standard Jalai Besai nya.

Empai lama tu tadi, Dato Sri Alexander mega kala madah, KKR deka minta belanja urung RM1 billion dikena ngaduka Jalai ‘Redline’ ba projek Jalai Besai Pan Borneo.– EDISI UKAS