SPAOH: Sekula Primari Bansa China (SJKC) Chung Hua, Spaoh nerima belanja tambah penyampau RM750,000 ari Perintah Sarawak dikena ngaga baru sekula nya.
 
Sapit Premier Sarawak ti mega Kaban Kunsil Nengeri (ADUN) Bukit Saban, Datuk Amar Douglas Uggah Embas madah, agih belanja diberi nya mandangka perintah naka ulih nentuka pemansang pelajar ba menua pesisir seruran dikenati.
 
“Terubah suba, Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg udah ngemendarka agih belanja RM2 juta enggau tambah tu, penyampau semua manggai RM2.75 juta.
 
“Kitai ngarap ke projek tu ulih dipun enggau lengkas ungkup pemaik bala nembiak di Spaoh,” ku iya madah ngagai media pengudah bejadi pengawa nyua agih belanja nya kena Hari Lima.
 
Ku iya, taja SJKC Chung Hua nya sekula bansa China, tang lebih 90 peratus nembiak dia datai ari raban bansa Iban enggau Melayu.
 
“Tu mih entara institusyen ti dikeandalka kitai ulih narak pemereti ati enggau penyerakup kenyau ari mit, ngambi bala nembiak mansang besai bela mereti enggau bebasaka pangan diri.
 
“Tu seriris enggau polisi Gabungan Parti Sarawak (GPS) enggau Premier Sarawak ti mega meri bantu ngagai sekula mission enggau institusyen pelajar bukai,” ku iya.
 
Iya madah baru, ba taun tu, Perintah Sarawak udah ngagihka RM20 juta nengah Unit Pekara Pengarap Bukai (UNIFOR) ngagai sekula mission ba selampur Sarawak, seraya sekula bantu China mega nerima perati nengah opis menteri ti bekaul.
 
Iya nerang baru, polisi ti dipejalai ukai semina jaku ngapa, tang dibantai nengah pengawa enggau asil ti nyata sereta diasai rayat, setipak enggau Strategi Pemansang Pengudah COVID-19 (PCDS) 2030 ti ngemeratka prinsip inklusiviti enggau pengelantang semua.
 
Ba pengawa ke sama, iya mega bisi nyua agih belanja Projek Mit Pemansang Menua Pesisir (MRP) ngagai sekeda gempung ukai dikuasa perintah (NGO) lokal dikena nyukung pejalai aktiviti komuniti enggau sosial ba sitak Bukit Saban.
 
Sama datai Residen Bagi Menua Betong Richard Michael Abunawas enggau Pemantu Tadbir Nguasa Pelilih Mit Spaoh Denny Lim.-EDISI UKAS