BETONG: Berita gaga ngagai peranak Beladin lebuh Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg ngemendarka projek ngaga enggau nembu ke 46 unit rumah baru di RGC Beladin ngena Sistem Berumah Industri (IBS).
 
Berita manah nya dipadah Menijar Besai Kaunsil Pemansang enggau Pengintu Tanah (LCDA), Datu Sr Zaidi Mahdi, pengudah iya meri penerang ngagai Premier Sarawak senentang pejalai Projek Pengentap Pendiau Baru Orang Berikan (PSN) Beladin ba siti pengawa nyua kunchi rumah ngagai 68 ruang bilik orang berikan ti mujur bulih rumah di baruh projek nya.
 
Ku penerang ari LCDA kena Hari Enam, projek ngaga rumah baru nya deka digaga sida nyadi sebagi ari inisiatif Projek Rayat, ngena agih belanja RM22.1 juta.
 
Nya berindik ari pemujur renggat keterubah projek ti mungkur kereja infrastruktur, ngaga rumah enggau nyeleti ke alai semua ungkus manggai RM58.2 juta, semua nya dipelanja Perintah Sarawak.
 
Ku Datu Sr Zaidi, projek baru nya deka ngena manah infrastruktur ke udah bisi ti udah tembu bat aba nya.
 
Pekara nya deka ngasuh pengawa ulih dipun tekala nya, enda ibuh nganti taba baru lalu nya ngelimat jam enggau ungkus projek.
 
Pekara nya mega mandangka pengeran Perintah Sarawak nyendiaka rumah bisi kualiti enggau ulih dibeli rayat, lebih agi komuniti berikan, setipak enggau agenda pemansang nengeri ti inklusif enggau meruan.
 
Ari projek dikemendar nya, dikearap 46 unit rumah baru ulih digaga enggau lanchar sereta meri pemaik ngagai peranak Beladin, sereta negap pengelantang peranak dia di baruh pemansang inklusif Sarawak. -EDISI UKAS