BETONG: Komuniti berikan di Beladin enda lebu nganti bisi rumah ti lantang agi lebuh 59 orang berikan dia nerima kunchi rumah baru di baruh Projek Pengentap Pendiau Baru Orang Berikan (PSN) Beladin.
Pengawa nyua kunchi rumah nya dipenyadika Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg kena Hari Enam, lalu nya meri pengarap baru ngagai sida ti ngelama tu bepanggai idup ba asil tasik.
Iya mega bisi limpang ngerandau bala penerima, ngabas rumah siku ari penerima sereta meri bantu pemakai kelai penyiru enggau sukung Perintah Sarawak ngagai komuniti berikan.
Projek nya pengawa begulai entara Opis Menteri Betanam Betupi enggau Jamin Pemakai (KPKM), Perintah Sarawak, Kaunsil Pemansang Ikan Malaysia (LKIM) enggau Unit Perambu Ekonomi Sarawak ke alai semua ungkus manggai RM21.25 juta.
Renggat keterubah udah meda 68 unit rumah beungkus RM6.8 juta tembu, ke alai 59 penyereta udah nerima kunchi rumah enggau nyain sempekat ngempu.
Projek Pengentap Pendiau Baru Orang Berikan (PSN) Beladin siti ari pengawa strategik perintah nyendiaka genturung berumah ti lantang agi, berurun enggau strategik ngagai komuniti berikan, lalu negapka pengelantang enggau nyamin pengiup raban nya jemah.
Inisiatif tu mega seriris enggau juluk Perintah Sarawak negapka pengelantang rayat, lebih agi komuniti berikan ti nyadi entara raban meri asil besai ngagai sektor berikan nengeri.-EDISI UKAS