BETONG: Betaun nganti, sungai ti nyengkang Beladin enggau Pusa ti nyadi entara menua enggau pengidup beribu peranak tebing tasik.
 
Tang diatu, semua nya berubah, Jematan Batang Saribas 1 ti sebedau tu semina mimpi peranak dia, udah bediri gah ukai semina nyadi penyambung, tang ngerandang pengidup ti menyana agi.
 
Jematan Batang Saribas 1 ukai semina siti projek infrastruktur aja, tang kedap baru ba pengidup ti ngelama tu dikeingin peranak tebing tasik.
 
Diatu, mimpi nya udah nyadi nyata enggau pengidup ti menyana agi.
 
Pengawa bejadi ke jematan sepanjai 1.55 kilometer nya udah dipenyadika Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg kena Hari Enam, lalu nyadi kelai jeman baru pemansang menua pesisir ba kandang tebing tasik Sarawak.
 
Digaga ngena ungkus RM375.5 juta, jematan nya bisi 16 tiang besai ti mega mungkur pengawa nyeleti enggau ngaga jalai baru sepanjai 6.7 kilometer, lalu ngemuntangka pejalai entara Beladin enggau Pusa ti ngelama tu bepanggai ba servis feri.
 
Ba penemu Tuai Kampung Hilir Pusa, Mat Saini, jematan tu ukai semina siti perengkaguna fizikal aja, tang lambang pengeransing perintah ngangkatka tikas idup rayat ba menua ulu.
 
“Kitai meri terima kasih besai ngagai Premier Sarawak laban udah meri jematan tu ungkup perengkaguna kitai semua.
 
"Enti dibanding sebedau tu, kami ditu ngena servis feri ti bisi maya nyau deka sejam ngelayang.
 
“Diatu semina berapa minit aja. Jematan tu deka meri mayuh pemaik ngagai peranak Kampung Pusa lebih agi ari sukut pejalai enggau ekonomi,” ku iya lebuh dirandau UKAS lebuh ngemata pengawa bejadi jematan nya.
 
Tuai Kampung Tengah Pusa, Jaafar Yusup mega madah ke diri chukup gaga meda jematan nya digaga lalu ngumbai nya lambang baru ngagai sitak Pusa enggau menua ngelingi.
 
“Aku chukup gaga ati meda pengeran Perintah Sarawak mai pemansang ngagai peranak nyengkaum ba tebing tasik.
 
"Ba kami, jematan tu lambang Kampung Pusa, penyambung ngagai genturung pendiau bukai.
 
“Kebendar, kami udah lama nganti jematan tu tembu. Tu pengarap orang menua tu lebih agi peranak Kampung Pusa enggau Beladin. Tu meri empas besai ari sukut ekonomi enggau pemansang,” ku iya.
 
Seraya peranak Beladin madah, jematan nya dekan nyungkak aktiviti ekonomi dia.
 
Tuai Kampung Hilir Beladin, Awang Subih Awang Halil madah ke jematan nya nyadi penyungkak pemansang menua.
 
“Ari jematan tu, kitai pechaya ekonomi peranak ditu deka maju agi.
 
“Aku ngari ke semua peranak meri yerima kasih ngagai Premier Sarawak lebih agi Perintah Sarawak ti udah ngaga siti jematan ti chukup besai reti ngagai peranak ditu,” ku iya. -EDISI UKAS