BETONG: Sarawak terus ngasai pemansang rentayan jalai alun ti deras lebuh 11 iti jematan deka tembu enda lama da.
 
Sapit Premier Sarawak, Datuk Amar Douglas Uggah Embas madah, projek ngaga jematan nya sebagi ari 16 iti jematan ti benung enggau udah digaga ba selampur nengeri ngena ungkus RM5.9 bilion.
 
Ku iya, entara jematan ti udah tembu iya nya Jematan Marudi, Jematan Batang Rajang, Jematan Muara Lassa, Jematan Batang Rajang enggau Jematan Batang Saribaskelimpah v Jepak ti disadang dipenyadi enda lama da.
 
“Tu mih juluk Premier Sarawak deka meda pejalai ari Kuching ke Miri enda ibuh ngena servis feri.
 
“Tu juluk ti chukup lurus lalu tu ukai semina juluk aja tang datai enggau agih belanja RM5.9 bilion dikena ngaga 16 iti jematan tu,” ku iya.
 
Iya bejaku munyi nya ba Pengawa Bejadi Jematan Batang Saribas 1 ditu, kena Hari Enam.
 
Pengawa bejadi nya udah dipenyadika Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg.
 
Datuk Amar Douglas Uggah ti mega Menteri Infrastruktur enggau Pemansang Penyangkai Kapal Sarawak madah ke Perintah Sarawak dikemudi Gabungan Parti Sarawak (GPS) ngembuan polisi ti nyengala enggau inklusif ngemansangka infrastruktur nengeri.
 
“Polisi iya tu dikena nentuka Sarawak terus maju enggau rayat bepenatai pemisi tinggi.
 
“Sitak ti bisi enggau infrastruktur patut dikemansang enggau jampat.
 
“Nya alai, Opis Kereja Raya (JKR) bisi tanggungpengawa besai bejalaika projek rayat enggau projek bukai berega lebih RM30 bilion ba selampur Sarawak,” ku iya.
 
Sama datai, Sapit Menteri Pengelantang Komuniti Datuk Mohamad Razi Sitam, Sapit Menteri Nembiak, Lumba enggau Pemansang Orang Dagang (Pemansang Nembiak Enggau Lumba) Dato Gerald Rentap Jabu, Sapit Menteri Pemansang Infrastruktur Sarawak Datuk Ir Aidel Lariwoo, Sapit Menteri Pemansang Mengeri enggau Pengeraja Asal Datuk Len Talif Salleh, Sapit Menteri Pelajar enggau Inovasyen Sarawak Datuk Dr Annuar Rapaee, Sapit Menteri ba Opis Premier Sarawak (Penyeraris Projek Ungkup Agensi Pemansang Kandang Menua, DBKU enggau Pekara Islam) Datuk Abdul Rahman Junaidi, Sapit Sekretari Perintah Sarawak (Perambu Ekonomi enggau Pemansang) Dato Sri Dr. Muhammad Abdullah Zaidel, bala Kaban Kunsil Nengeri (Adun), Direktor Kereja Raya Sarawak Dr Cassidy Morris, bala tuai opis sereta temuai dipebasa ke bukai.-EDISI UKAS