MIRI: STEM Trailblazers 2025 nyadi pelasar narak pelajar inovatif ba bala anak Sarawak.
 
Menteri Pelajar, Inovasyen enggau Pemansang Penau Sarawak Dato Sri Roland Sagah Wee Inn madah, program nya ukai semina program ninting taun aja, tang nyadi siti pengawa nempa pemujur rebak biak Sarawak dudi hari ba pelajar Sains, Teknologi, Injiniring enggau Matematik (STEM).
 
"Program tu siti nalan narak budaya inovasyen, belajar enggau nengkebang bal bala nembiak di selampur nengeri,” ku iya ba Pengawa Bejadi STEM Trailblazers 2025 di Universiti Curtin Malaysia kena Hari Lima.
 
Iya madah baru, timbal manah diterima ba edisyen sekali tu nyata nunjukka rebak biak rindu ke pelajar STEM.
 
Nitih penerang, bisi 157 penyereta diterima ba pekit besai, ngelui ari disadang enggau 91 tim, nyengkaum 28 penyereta tambah.
 
Kelimpah ari nya, Dato Sri Roland bekunsi sekeda inisiatif besai opis menteri sida ti benung dipejalai nentuka pelajar STEM terus ngerembai enggau ulih diakses serap komuniti nengah program mindah kin kitu STEM Catalyst enggau Sarawak Education Enhancement Programme (SEEP) dipejalai enggau tuju nyendiaka tuisyen pechuma ngagai nembiak Pom 3 enggau 5 ba subjek bekaul STEM nyengkaum Free Tertiary Education Scheme (FTES) ti belabuh taun baru.
 
"Semua pengawa tu sebagi ari juluk besai agi di baruh Strategi Pemansang Pengudah COVID-19 (PCDS) 2030 ngangkatka Sarawak nyadi siti ekonomi ngena penemu ti bepuguka kuasa pengereja landik enggau inovatif," terang iya.
 
Ngenang silik pasal program dua hari nya, iya madah ke bala nembiak deka bisi peluang ngambi bagi ba bemacham bengkel interaktif ngaul artificial intelligence (AI), teknologi gadung, robotik enggau masuk pekit ti meransang runding kreatif enggau semangat gawa beraban.
 
Sama datai, Sapit Menteri Pelajar, Inovasyen enggau Pemansang Penau Sarawak Datuk Francis Harden Hollis. -EDISI UKAS