BETONG: Rentayan jalai nebing tasik ti benung digaga ba Sarawak deka nyadi penyungkak tauka 'game changer' ngagai transformasyen landskap pemansang menua pesisir nengeri tu manggai 2030.
Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, Jematan Batang Saribas 1 ti udah tembu menyana nyadi penyambung besai ngemujurka projek rentayan jalai nebing tasik ti nyambung genturung pendiau enggau rumah panjai ba sepanjai menua tebing tasik.
“Ari projek tembu tu, rayat ulih ngelawa Kuching nengah rentayan jalai ti benung digaga kitai lalu enda lama da kitai deka bejadika Jematan Lingga ti deka nyambung 'second trunk road'.
“Nya alai ari infrastruktur tembu tu, dia taun 2030 rentayan infrastruktur kitai deka nyadi siti rentayan ti deka nyadi 'game changer' ba pemansang menua pesisir," ku iya.
Iya nyebut jaku nya ba aum media pengudah bejadika Pengawa Bejadi Jematan Batang Saribas 1 ditu, kena Hari Enam.
Sama datai Sapit Premier Sarawak, Datuk Amar Douglas Uggah Embas, Sapit Menteri Pengelantang Komuniti Datuk Mohamad Razi Sitam, Sapit Menteri Nembiak, Lumba enggau Pemansang Orang Dagang (Pemansang Nembiak Enggau Lumba) Dato Gerald Rentap Jabu, Sapit Menteri Pemansang Infrastruktur Sarawak Datuk Ir Aidel Lariwoo, Sapit Menteri Pemansang Mengeri enggau Pengeraja Asal Datuk Len Talif Salleh, Sapit Menteri Pelajar enggau Inovasyen Sarawak Datuk Dr Annuar Rapaee, Sapit Menteri ba Opis Premier Sarawak (Penyeraris Projek Ungkup Agensi Pemansang Kandang Menua, DBKU enggau Pekara Islam) Datuk Abdul Rahman Junaidi, Sapit Sekretari Perintah Sarawak (Perambu Ekonomi enggau Pemansang) Dato Sri Dr. Muhammad Abdullah Zaidel, bala Kaban Kunsil Nengeri (Adun), Direktor Kereja Raya Sarawak Dr Cassidy Morris, bala tuai opis sereta temuai dipebasa ke bukai.
Ngenang silik agi, Premier Sarawak madah ke jematan nya deka ngerandang mayuh agi peluang aktiviti ekonomi, nyengkaum pemansang pengawa betanam betupi moden ba menua pesisir.
“Aku mega meri terima kasih ngagai rayat ba sitak Betong ti udah meri kerejasama ngambi kitai ulih bejalaika projek ti besai ke alai ungkus projek urung RM375 juta," ku iya.
Dulu ari nya, iya mega ngelancharka pengawa numbuhka Agensi Pemansang Kandang Menua Betong (BDDA) ti deka nyadi penyungkak pemansang strategik dia.
Ba pengawa ke sama, iya bisi ngemendarka sekeda peminta pemansang nyengkaum ngaga baru Opis Pelilih Betong enggau Opis Kaunsil Pelilih Betong, nyeleti perengkaguna karan ke Renggat 3 ba Bagi Menua Betong sereta pemansang Agropark di Beladin, Pusa.
Premier Sarawak udah nya neruska pejalai gawa ke Pengentap Pendiau Orang Berikan Beladin ngambi nyua kunchi ngagai dua penerima sereta nyua Bantu Belanja Idup Orang Berikan Beladin 2025.
Iya mega ngabas taba projek ngaga Tebing Ai Beladin, Pusa ti beungkus RM45 juta.-EDISI UKAS
