MIRI: Raptai keterubah ngintu Hari Sarawak Taun 2025 udah diatur di Stadium Bandaraya Miri kena Hari Lima ngaul bemacham agensi enggau opis perintah.
 
Program raptai nya diatur Unit Protokol, Istiadat enggau Ngatur Acara Sarawak (UPPANS) dikena besikap tumu sebedau hari nyadi Hari Sarawak ti diatur kena 22 Julai 2025 di Mengeri Besai Miri.
 
Sapit Menteri Nembiak, Lumba enggau Pemansang Orang Dagang Sarawak, Datuk Dr Ripin Lamat udah datai ngabas enggau meda semua raptai ngambi pengawa lanchar.
 
Iya mega ngelara enggau meri sadang penemu ungkup pemaik begulai nentuka pengawa lanchar ba hari pengerami nyadi ila.
 
Tuju raptai nya ngaluska pejalai pengawa, ngeripih bala penyereta enggau besikap logistik nentuka pengawa lanchar ti deka digulu bala pemesai nengeri, nyengkaum Yang di-Pertua Negeri Sarawak Tun Pehin Sri Dr Wan Junaidi Tuanku Jaafar enggau Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg.
 
Pengerami ngintu Hari Sarawak taun tu ngena sulu jaku “Sarawak Maju Makmur”, ti mandangka juluk nengeri tu nuju pemansang enggau pengelantang rayat inklusif.
 
Bemacham program besai enggau pemerindang disadang ngerichah pengerami nya ti deka dirami di Miri ti nyadi tuai rumah.
 
Sama datai, Residen Bagi Menua Miri Galong Luang, Pegawai Pelilih Miri Siti Rohanie Yusof sereta bala tuai opis ti dikuasa Komiti Besai Ngintu Pengerami Hari Sarawak 2025. -EDISI UKAS