CHINA: Sarawak nampung pengawa nyerungkai teknologi ‘waste-to-energy’ enggau simpan kuasa hidro pam nengah siti pejalai gawa ke menua China iya nya Taman Industri Ekonomi Kitar Semula di Guangzhou Fushan enggau Stesyen Kuasa Simpan Hidro Pam di Shenzhen empai lama.
Penerang media Opis Menteri Utiliti enggau Telekomunikasyen Sarawak (MUTS), tuju pejalai gawa nya negapka kerejasama, nyerungkai teknologi inovatif enggau minta sadang penemu pasal pengawa pemadu manah ba pekara utiliti, grid pintar, kuasa beresi enggau fasiliti nyimpan kuasa hidro moden ba kededua mengeri besai di China nya.
Di Guangzhou, deligit betuai ke Menteri MUTS, Dato Sri Julaihi Narawi udah ngelawa Taman Industri Ekonomi Kitar Semula Guangzhou Fushan ti endur loji ngeluarka kuasa insinerator pemadu besai ba dunya ke alai sida diberi penerang pasal sistem begulai nukar teda ngagai kuasa, aplikasyen pemansut kuasa baru, integrasyen grid pintar sereta proses nukar kuasa beresi ungkup utiliti mengeri meruan enggau ngeluarka kuasa karan ti meruan agi.
Seraya di Shenzhen, deligit nya mega ngelawa Stesyen Kuasa Simpan Hidro Pam Shenzhen, siti ari fasiliti simpan kuasa hidro pam pemadu moden enggau pemadu besai di China.
Dato Sri Julaihi madah ke infrastruktur nyimpan kuasa baka nya endang engkeman ba landskap kuasa Sarawak ti benung ngerembai, lebih agi nambahka pengawa bekenaka kuasa ulih dikena baru.
Berebak enggau nya, iya bisi ngulu aum begulai enggau bala tuai Perintah Shenzhen enggau tuai opis ti betuai ke Direktor Jeneral Opis Pekara Luar Shenzhen, Cao Saixian.
Aum nya meda kededua raban besilih penemu bekaul bekal ai, bekal kuasa karan, telekomunikasyen enggau ICT sereta nyerungkai pengulih kerjasama nangkan nya.
Pemansang Shenzhen ba infrastruktur utiliti enggau sambung digital mega narit ati Sarawak, lebih agi ari sukut aplikasyen teknologi ba mengeri enggau benung deras mansang.
Pejalai gawa nya negapka pengeransing Sarawak nambahka pengetan kuasa enggau ngerembai kerejasama antarabansa, lebih agi ba teknologi kuasa gadung.
Sama nemuai, Sapit Menteri Utiliti enggau Telekomunikasyen Sarawak (Telekomunikasyen) Datuk Liwan Lagang, Sapit Menteri Utiliti enggau Telekomunikasyen Sarawak (Sarawak Energy Berhad enggau PETROS) Dato Ibrahim Baki enggau Sekretari Pekara Wang Sarawak Dato Sri Dr Wan Lizozman Wan Omar. -EDISI UKAS
