BETONG: Juluk ati betaun pengelama diatu nyadi nyata lebuh Jematan Batang Saribas 1 dipenyadi sehari tu lalu nurai cherita baru ngagai peranak ti diau mendam ba genturung nebing tasik Sarawak.
Badu agi berintai panjai ba tebing sungai lalu badu agi bepanggai ba servis feri ti 30 minit ngelayang ai.
Diatu, berapa minit aja endur ngelayang ai Batang Saribas berekat infrastruktur besai ti nyadi lambang pemansang menua pesisir Sarawak.
Pengawa bejadi jematan nya udah dipenyadika Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg.
Ungkus manggai RM375.5 juta, jematan 1.55 kilometer pemanjai nya bediri gah enggau 16 iti tiang jematan, nyambung jalai sepanjai 6.7 kilometer ti mega ngaul pengawa nyeleti enggau ngaga jalai baru ba Beladin enggau Pusa.
Kelimpah jematan besai, projek nya mega mungkur pengawa nyeleti jalai lama penyauh 0.887 kilometer di Beladin enggau 1.62 kilometer di Pusa sereta ngaga jalai baru penyauh 1.851 kilometer di Beladin enggau 0.792 kilometer di Pusa.
Ba pengasai ati peranak ti ngelama tu semina bepanggai ba servis nyadi pengangkut ngelayang ai, jematan nya baka pengidup baru sida.
Projek tu mega kelai penau enggau pengeransing Perintah Sarawak negapka pemansang menua pesisir lalu kandang nebing tasik badu tinggal.
Bela datai ngemata pengawa nya Sapit Premier Sarawak, Datuk Amar Douglas Uggah Embas, Sekrtari Perintah Sarawak, Datuk Amar Mohamad Abu Bakar Marzuki, Sapit Menteri Pengelantang Komuniti Datuk Mohamad Razi Sitam, Sapit Menteri Nembiak, Lumba enggau Pemansang Orang Dagang (Pemansang Nembiak Enggau Lumba) Dato Gerald Rentap Jabu, Sapit Menteri Pemansang Infrastruktur Sarawak Datuk Ir Aidel Lariwoo, Sapit Menteri Pemansang Mengeri enggau Pengeraja Asal Datuk Len Talif Salleh, Sapit Menteri Pelajar enggau Inovasyen Sarawak Datuk Dr Annuar Rapaee, Sapit Menteri ba Opis Premier Sarawak (Penyeraris Projek Ungkup Agensi Pemansang Kandang Menua, DBKU enggau Pekara Islam) Datuk Abdul Rahman Junaidi, bala Kaban Kunsil Nengeri (Adun), Direktor Kereja Raya Sarawak Dr Cassidy Morris, bala tuai opis sereta temuai dipebasa ke bukai.-EDISI UKAS
