KUCHING: Ex-Senator, Tan Sri Dato Sri Empiang Jabu, dikumbai siku indu ti pegari nama ukai semina dikemegah komuniti Dayak aja, tang semua indu di Sarawak.
Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, Tan Sri Empiang chukup besai jasa ba pengawa negap indu Dayak, kelebih agi nyadi tuai enggau pengeransing ati ti nadai kala mantul.
“Iya udah bejalai neresap serap menua Sarawak lalu udah belelang ke menua tasik ngiga peneleba enggau bekunsi penemu sereta inspirasyen enggau bala indu Sarawak,” ku iya.
Iya nibar ke jaku nya lebuh bejadi Pengerami Ngelanchar Bup Tan Sri Dato Sri Empiang Jabu: A Legacy of Empowering Dayak Women ba siti hotel tebilang ditu, kena Hari Enam.
Premier Sarawak madah baru, Tan Sri Empiang udah ngesan mayuh batang pengawa sekumbang nyadi pengajar, bini ngagai tuai politi, indai ti penyayau, senator, kaban politik ti regas sereta negika pesaka budaya, kelebih agi nengah pangku pengawa iya ba Sarakup Indu Dayak Sarawak (SIDS).
Iya mega bisi ngenang pasal asal penatai Tan Sri Empiang ti mansang besai ba menua ulu lalu ngena peneleba idup ti mayuh pemar nya nyadi pengering enggau inspirasyen ngambi terus maju.
“Ari pemeras gawa enggau pengeransing ati, iya seruran bepegai teguh ba pengandal ke alai pelajar nya kunchi ngagai pengidup ti menyana.
“Pengawa ditegika iya nyadi peransang ngagai kitai ba perintah terus meri perati ngagai pelajar nyadi ke chara munas penyeranta enggau ngangkatka tikas idup rayat,” ku iya.
Berindik ari nya, Premier Sarawak madah ke diri deka mai kisah ditegika Tan Sri Empiang ke Kongres Besai Indu ASEAN, ngambi bekunsi ke pengeransing enggau pengeliat ati indu Sarawak ti nyadi chunto nyata baka ni indu ulih mai ubah enggau nempa mayuh agi pemujur rantau tu dudi hari.
Sama datai, bini Premier Sarawak, Puan Sri Datuk Amar Juma’ani Tun Tuanku Bujang; dua Sapit Premier Sarawak, Datuk Amar Douglas Uggah Embas enggau Datuk Amar Prof. Dr. Sim Kui Hian; Speaker Kunsil Nengeri Sarawak, Tan Sri Datuk Amar Mohamad Asfia Awang Nassar; Menteri Pemansang Indu, Nembiak Mit enggau Pengelantang Komuniti, Dato Sri Fatimah Abdullah; Menteri Kereja Raya, Dato Sri Alexander Nanta Linggi; Sekretari Perintah Sarawak, Datuk Amar Mohamad Abu Bakar Marzuki; bala sapit menteri Kabinet Sarawak; ex-Sapit Kepala Menteri Sarawak, Datuk Patinggi Tan Sri Alfred Jabu Numpang, Chairman SAINS Sdn. Bhd., Datuk Patinggi Tan Sri George Chan Hong Nam sereta temuai dipebasa ke bukai.-EDISI UKAS
