KUCHING: Bisi 71 nembiak Yayasan Kemajuan Insan Sarawak (YAKIN) datai ari ruang bilik seranta nerima bantu uniform sekula ba pengawa meri bantu ari Yayasan Sarawak ti diatur di Auditorium Wisma Adenan, kena Hari Enam.
Pengawa nyua bantu nya udah dipenyadika Sapit Menteri ba Opis Premier Sarawak (Undang-Undang, MA63 enggau Kaul Nengeri-Perintah Besai), Datuk Sharifah Hasidah Sayeed Aman Ghazali, ti mega digulu Direktor Yayasan Sarawak, Datu Mohamad Junaidi Mohidin enggau pegawai kanan Opis Pelajar Sarawak.
Bantu beungkus RM200 siku nya ulih dikena meli uniform sekula, gari bukai baka sementing, kantung, stukin enggau kasut sekula, gari kena bemain enggau uniform kelab enggau serakup.
Tu entara inisiatif ti seruran dipejalaika perintah nengeri dikena ngelempungka tating belanja apai indai lebuh datai ba pengawa bepungkal sekula.
Penerima bantu datai ari bala nembiak ari SMK Green Road (30), SMK Batu Lintang (6), enggau SMK Bandar Samariang (35), nyengkaum anak patu balu enggau nembiak dipelanja indai tunggal.
Ku penerang media ari Yayasan Sarawak, di baruh Langgur Pemansang Malaysia Lumpar Ke-12 (RMK12), Perintah Sarawak terus mantaika pengeransing diri ngintu pengelantang pelajar ngena agih belanja sepenyampau RM24 juta ungkup program bantu uniform sekula.
Naka ujung taun 2024, RM17.5 juta udah diberi, meri pemaik ngagai 87,311 nembiak di selampur nengeri.
Sebagi ari pengawa ngemanah program tu, agih belanja ninting taun ditambah ari RM4 juta ngagai RM6 juta berengkah 2024, baka dikemendarka Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg ba Bajet 2024.
Ba taun 2025 aja, bisi 30,000 nembiak disadang nerima pemaik ari inisiatif nya.
Seraya lebuh dirandau media, Datuk Sharifah Hasidah nyemetak madah ke Perintah Sarawak tetap negika hak nengeri baka ti disempekat ba Sempekat Malaysia 1963 (MA63), kelebih agi tagih 35 peratus penuduk Parlimen.
“Kitai deka terus nagih. Tu hak kitai. Tang pengawa tu begunaka timpuh panjai, randau enggau raban bekaul. Kitai enda deka belembut ba pekara tu,” ku iya nyemetak.-EDISI UKAS
