MUKAH: Kaul Mukah mandangka pengetan budaya enggau pesaka bansa Melanau ti enda mudah lenyau ngapa taja diserunyut pemansang.
 
Kaban Kunsil Nengeri (ADUN) Tellian, Royston Valentine madah, Kaul Mukah nya pelasar pemadu engkeman ungkup komuniti Melanau mandangka pesaka enggau budaya bansa ti ngembuan penyelai kediri empu.
 
Iya madah, pengerami nya mega ulih nyadi penyungkak pemansang dagang temuai di kandang menua Sarawak.
 
“Sehari tu, kitai begempuru ditu ukai semina ngerami hari besai aja, tang mega begelumu dikena mandangka pengetan budaya enggau pesaka bansa Melanau nengah pelasar Kaul Mukah ti dirami kitai ninting taun kenyau ari suba.
 
“Pengawa tu, ti diatur belabuh ari 19 nyentuk 27 April 2025 ukai semina pengerami aja; tang nyadi pelasar pemadu engkeman ngagai komuniti Melanau mandangka pesaka enggau budaya bansa ti chukup nyelai sereta ulih nyungkak pemansang dagang temuai di kandang menua Sarawak tu,” ku iya.
 
Iya bejaku munyi nya lebuh Pengerami Bejadi Kaul Mukah 2025, ti diatur di Pantai Kala Dana, ditu, kena Hari Enam.
 
Sama datai ba pengerami nya Menteri Dagang Temuai, Industri Kreatif enggau Seni Pemerindang Sarawak, Dato Sri Abdul Karim Rahman Hamzah tin gari ke Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg.
 
Ngenang silik agi, Royston madah ke pengawa ngatur pengerami nya ukai semina dikena bebasaka pengarap asal aki ini menya, tang dikena nyerungkai gaya idup komuniti Melanau.
 
“Pengerami tu ukai semina program aja, tang mai kitai nyerungkai gaya idup Melanau ari sukut tanda, pemakai, main, gari enggau bemacham pekara bukai ti nyadi identiti nyelai bansa Melanau,” ku iya.
 
Ba taun tu, Kaul Mukah udah nyendiaka 24 aktiviti nyerangkung program rasmi, pekit, bengkel, pemerindang main asal, pemerindang, pemandang, bejual enggau ke bukai.
 
Royston nerang, semua aktiviti nya ditusun manah belalauka identiti bansa Melanau enggau pengawa ngangkatka pesaka budaya ti patut diintu meruan.
 
Sama datai, Menteri Pemansang Indu, Nembiak Mit enggau Pengelantang Komuniti Sarawak, Dato Sri Fatimah Abdullah; Sapit Menteri Ekonomi ti mega Kaban Parlimen Mukah, Dato Hanifah Hajar Taib; Sapit Menteri ba Opis Premier Sarawak (Integriti enggau Ombudsman), Datuk Dr Juanda Jaya; Kaban Parlimen Igan, Ahmad Johnie Zawawi; ADUN Daro, Safiee Ahmad; ADUN Jepak, Iskandar Turkee; Residen Bagi Menua Mukah, Datu Kueh Lei Poh; sereta temuai dipebasa bukai. -EDISI UKAS