KUCHING: Perintah Besai udah setuju nyerariska undang-undang dagang karbon Sarawak enggau langgur undang-undang ba renggat nasional, ngangkatka Sarawak model ba pengawa ngaga polisi pekara undang-undang bekaul ubah klimet enggau ekonomi karbon.
 
Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, undang-undang nengeri bekaul Nangkap, Ngena enggau Nyimpan Karbon (CCUS) sereta ngurang gas ngamahka angin udah digaga tumu agi lalu diatu nyadi malin ba pengawa ngaga polisi perintah besai.
 
“Kitai deka bekerejasama enggau Perintah Besai maya kitai bejalaika dagang karbon entara kitai enggau orang ti meli.
 
"Alhamdulillah, Perintah Besai setuju nyerariska undang-undang kitai enggau langgur undang-undang sida ti deka dibantai ba Parlimen. Reti nya, undang-undang kitai mega nyadi model ngagai Perintah Besai," terang iya.
 
Iya nerang pekara nya lebuh bejaku ba mua mayuh rambau Pengerami Apresiasi Opis Menteri Pengeraja Asal enggau Pemansang Mengeri (MUDENR) ba siti hotel tebilang ditu kena Hari Lima.
 
Premier Sarawak madah baru, pengawa nyeraris nya beguna endar laban dagang karbon belalauka protokol enggau langkar undang-undang antarabansa.
 
Nya alai ku iya, kerejasama entara Sarawak enggau Perintah Besai beguna endar dikena nentuka pejalai sistem dagang karbon ti dikemendar, sikar enggau meruan.
 
Sama datai, bini Premier Sarawak Puan Sri Datuk Amar Hajjah Juma'ani Tun Tuanku Bujang, Sapit Premier Sarawak, Datuk Amar Awang Tengah Ali Hasan, Sapit Menteri MUDENR Datuk Len Talif Salleh enggau Sekretari Mendam MUDENR Datu Abdullah Julaihi. -EDISI UKAS