KUCHING: Perintah Sarawak merambu ngaga siti polisi luyang baru manggai taun 2026 ti meri perati ngagai pengawa ngintu rampa menua enggau bekenaka teknologi moden ba industri luyang mineral.
 
Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, polisi baru nya deka nentuka pengeraja tanah diluyang enggau meruan nadai ngeruga struktur geologi endur nya.
 
Ku iya, nya bemalinka chara luyang di Kanada ti ulih ngangkatka endur ti diluyang dipeda baka nadai kala dikachau asil ari bekenaka teknologi ti enda ngeruga struktur tanah.
 
"Bakai ke dulu suba, kitai ngereja luyang sedandang (opencast) dini endur diluyang tang udah nya diteju pia aja, nya kebuah bisi endur luyang ti nyadi tasik baka ti nyadi ba Tasik Biru Bau.
 
"Tang teknologi baru, enda deka ngasuh endur luyang nyadi tasik laban dia tetap baka selama lalu endur ti diluyang nya deka ditimbuk baru ngena chara baru.
 
“Nya kebuah kitai deka ngaga polisi baru ti bebida ba industri luyang ti patut diperati kitai nyadi malin ba pengawa kitai nguji ke diri ba industri luyang.
 
"Kitai bisi juluk, enti ulih ba taun 2026 alai kitai bisi polisi silik ba pengawa luyang lalu nyadi pugu malin ngagai kitai ngatur aktiviti luyang,” ku iya.
 
Iya bejaku munyi nya ba Pengerami Apresiasi Opis Menteri Pengeraja Asal enggau Pemansang Mengeri (MUDENR) ba siti hotel tebilang ditu kena Hari Lima.
 
Iya mega meri terima kasih ngagai Sapit Premier Sarawak, Datuk Amar Awang Tengah Ali Hasan, laban ngetuai ke diliget ke Kanada ngambi meda model luyang meruan di menua nya.
Premier Sarawak nega nerangka polisi baru nya semina ngaul luyang mineral aja lalu enda nyerangkung sektor minyak enggau gas.
 
Sama datai, bini Premier Sarawak Puan Sri Datuk Amar Hajjah Juma'ani Tun Tuanku Bujang, Sapit Premier Sarawak, Datuk Amar Awang Tengah Ali Hasan, Sapit Menteri MUDENR Datuk Len Talif Salleh enggau Sekretari Mendam MUDENR Datu Abdullah Julaihi. -EDISI UKAS