KUCHING: Pengawa besikap Pengerami Ngintu Aidilfitri Madani Tikas Sarawak 2025 diatur lanchar ba pengawa raptai ti diatur di Stadium Perpaduan, Petra Jaya, kena Hari Empat.

Raptai nya mungkur panggau pemerindang, penyeraris atur pengawa rasmi, kereja nusun mija enggau bangku temuai, ngadu sistem panchar lampu, ngadu bunyi enggau muzik, sereta nyendia panggau besai enggau endur interaksyen rayat begulai enggau bala tuai.

Sekretari Politik Menteri Idar Kuasa enggau Transformasyen Ai ti nyadi Kaban Kunsil Nengeri (ADUN) Stakan, Datuk Hamzah Brahim sama datai meda pengawa nya, nentuka semua pekara teknikal enggau logistik diseraris enggau meruan.
 
Pengerami ngena sulu jaku 'Ihsan Menyentuh Jiwa, Toleransi Menyatu Negara' nya disadang dipenyadika Menteri Besai, Dato’ Seri Anwar Ibrahim pkena Hari Enam tu.

Bela disadang datai Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg begulai enggau bala menteri kabinet ti bukai.

Pengerami ngintu Aidilfitri diatur begulai entara Opis Menteri Idar Kuasa enggau Transformasyen Ai (PETRA) enggau Perintah Sarawak nya disadang matak penatai beribu pengabang ari pupu bansa enggau mayuh asal penatai, ti mandangka semangat penyerakup sereta nilai Malaysia Madani ti nyadi pugu atur pengawa menua.-EDISI UKAS