PADAWAN: Komiti Pemansang enggau Pengelikun Genturung Pendiau (JKKKj Kampung Annah Sibakar enggau Kampung Annah Sibuang begulai ngatur Pengerami Nyiberkat Tubi Bauh tauka merekat berau baru ti diatur di Balai Mayuhguna Kampung Annah Sibakar.
 
Pengerami nya ukai semina ngangkatka pengawa asal ti ditampung komuniti Bidayuh aja, tang mega nyadi pelasar ngenegapka kaul entara bala tuai enggau komuniti dia.
 
Sapit Menteri Pengangkut Sarawak (Langit enggau Jalai) Datuk Dr Jerip Susil, lebuh bejaku ba mua mayuh nyemetak madah ke pemesai guna ngetan budaya enggau pengawa asal komuniti Bidayuh, lebih agi ba pengawa bumai padi bukit ti udah dikemeran kenyau ari aki ini menya.
 
Iya madah pengawa bumai padi ukai semina ke pemakai aja tang lambang pengeliat ati, pengepuh enggau bebasaka rampa menua.
 
Berindik ari nya, iya ngarap ke rebak biak ulih mereti ke enggau neruska pesaka nya nyadi identiti bansa Bidayuh taja dunya terus berubah.
 
Kelai sukung ngagai komuniti dia, Datuk Dr Jerip ti mega Kaban Kunsil Nengeri (ADUN) Mambong mega nyuaka chek bela penyampau RM30,000 ngagai Tuai Raban Bansa Kampung Annah Sibakar enggau Kampung Annah Siburan.
 
Pengerami nya mega digulu Pegawai Tadbir Nguasa Opis Pelilih Mit Padawan Julius Scott Sapong, Pemancha Bidayuh Pelilih Kuching Raymond Jihap, Sapit Tuai Nembiak Parti Pesaka Bumiputera Bersatu (PBB) Pampang Mambong Presley William, sereta bala tuai raban bansa sitak Annah Biya. -EDISI UKAS