BARAM: Serakup Indu Dayak Sarawak (SIDS) ngesan pangku pengawa besai ba kerejasama enggau Komiti Pemansang enggau Pengelikun Genturung Pendiau (JKKK) Rumah Panjai ungkup pemansang komuniti.
 
Sapit Menteri ba Opis Premier Sarawak (Buruh, Imigresen enggau Matau Projek) Datuk Gerawat Gala madah, penyampau tubuh kaban enggau unit ti nambah nunjukka bala tuai SIDS Marudi bisi tuju enggau seruran mantu komuniti.
 
"Aktiviti serakup begunaka pemagas gawa enggau pengeransing ati nentuka pengawa mujur.
 
"SIDS Marudi nyadi payung ngempung komuniti di sitak Puyut enggau Lubok Nibong," ku iya lebuh bejaku ba mua mayuh rambau Pengerami Bejadi Aum Besai Ninting Taun SIDS Pampang Marudi kena Hari Enam.
 
Nengah SIDS mega, bala indu Dayak ulih ditempa nyadi tuai labn sida bisi pengelebih enggau penau diri empu.
 
Kelimpah ari nya, Kaban Kunsil Nengeri (ADUN) Mulu nya madah, SIDS mega nanggam kaul kerejasama rat enggau bala Tuai Raban Bansa enggau Tuai Rumah.
 
Iya madah, pengawa ngaku SIDS Marudi ukai semina ba renggat pelilih menua aja, tang mega tikas nengeri Sarawak.
 
Berebak enggau nya, Datuk Gerawat Gala bisi meri RM5,000 dikena ngemujurka program nya.
 
Pemeri RM50,000 ngena Geran Projek Mit Pemansang Menua Pesisir (MRP) Mulu bela diberi ngagai SIDS Pampang Marudi ungkup aktiviti sepanjai taun 2025 enggau tuju ngenegapka agi SIDS nyadi gerempung indu ti seruran mansang.
 
Ngena peluang nya, Datuk Gerawat Gala mega bisi nyuaka chek Geran MRP DUN N.78 Mulu ngagai JKKK, unit-unit SIDS, serakup di sitak Puyut Lubok Nibong seraya bantu khas ngagai Gerija BEM Sungai Linei ngena belanja UNIFOR sepenyampau RM150,000.
 
Semua penyampau penerima bantu nya bisi 25 iku enggau semua bantu manggai RM479,100. -EDISI UKAS