TATAU: Menteri Ba Opis Premier Sarawak Dato Sri John Sikie Tayai ngatur pejalai ngabas ngagai endur ti dituntung penusah bah di sepanjai Batang Anap, belabuh ari Pasar Tatau nyentuk ke Muput kena Hari Enam.
 
Tuju pejalai nya deka meda empu gaya utai ke nyadi enggau empas ari bah ti nuntung sekeda menua ulu ketegal ujan bangat kenyau ari 20 Mac tu tadi.
 
Taja pia, pejalai ti dilanggur nyentuk ke Nanga Tau enda ulih diteruska ketegal jematan di Rumah Steven ti enda ulih ditengah ketegal ampuh.
 
Ba pejalai nya, Dato Sri John Sikie mega ngabas gaya penusah bah di SK Kuala Muput.
 
Nitih ke penerang, begunan sekula enggau rumah pengajar udah ampuh naka pala patung, ngujungka nembiak, pengajar enggau staf sekula diasuh pulai ke rumah sida empu ungkup pengelikun.
 
Raban nya udah nya ngabas Rumah Panjang Joseph ngambi meda empu bekau bah ke alai ai tama naka dapur rumah panjai nya.
 
Kelimpah ari nya, ku ripot Opis Entali Ai enggau Parit (DID) naka pukul 2 ngalih hari tadi, tikas ai di Muput udah ngelui ari tasah seraya Pasar Tatau ngerikod tikas bejaga enggau endur bukai ti bela ampuh bah iya nya Ulu Anap, Nanga Tau, Muput enggau Sangan.
 
Taja pia, naka diatu empai bisi Palan Pengenduh Sementara (PPS) dibuka di Pelilih Tatau.
 
Dato Sri John Sikie mega sinu ati ngenang nasip peranak ti tasah bah enggau meri jamin pengawa bukai deka diatur nentuka pengelikun enggau pengelantang peranak seruran diintu manah. -EDISI UKAS