KUCHING: Pengerami Makai Lemai beserimbai Gempuru Besai Parti Pesaka Bumiputera Bersatu (PBB) Sarawak Ke-16 nyadi lambang ngagai penyerakup enggau pengering parti.
 
Sepenyampau 4,522 iku pengari ari 82 pampang ngulu pengerami ti diatur di Palan Konvensyen Borneo Kuching (BCCK), kena Hari Enam, ngelaika pengeransing ati bala kaban ngagai tunga kuing parti.
 
Premier Sarawak ti mega Yang Dipertua Parti PBB Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg datai disempulang bala tuai bukai, nyengkaum Chairman Komiti Bepilih Parti, Datuk Awang Bemee Awang Ali Basah, sereta dua Sapit Yang Dipertua Parti PBB, Datuk Amar Douglas Uggah Embas enggau Datuk Amar Awang Tengah Ali Hasan.
 
Pengerami nya mega richah enggau pemerindang koir ari Kaunsil Seni Sarawak, lagu disadaka artis lokal, sereta chabut tikit benasip, mandangka pengerapit kaul dalam kaban parti.
 
Kelimpah nyadi pelasar ngerapitka agi kaul, gempuru nya mega mai reti chukup besai nentuka bala tuai dudi hari Parti PBB, nengah pengawa bepilih Kaunsil Supreme parti alai pemutus deka dipadah kena Hari Minggu sebedau pengawa nyimpul aum besai nya.
 
Gempuru Besai Parti PBB Sarawak Ke-16 diatur pengelama tiga hari belabuh ari 14 nyentuk 16 Februari 2025, enggau batang agenda negapka tunga kuing parti dalam napi pemar politik kemaya hari.-EDISI UKAS