KUCHING: Sarawak International Festival of Music and Arts (SIFMA) 2024 deka diatur kena 7 enggau 8 Disember tu ba Kunsil Nengeri (DUN) Sarawak.

Menteri Dagang Temuai, Industri Kreatif enggau Seni Pemerindang Sarawak Dato Sri Abdul Karim Rahman Hamzah madah, pengerami nya sebagi ari program ke digaga perintah dikena nyungkak seni pemerindang enggau kreatif di nengeri tu.

"Enda ulih ditingkah. Ninting ujung minggu bisi aja program diatur, kita empu ulih meda. Semua tu nyadi pematak nengeri Sarawak," ku iya madah.

Iya bejaku munyi nya ba aum media Sarawak E-Sport Expo 2024 (Sarex2024) enggau 5th Sarawak International Festival Of Music And Art ditu, Hari Lima.

Dato Sri Abdul Karim mega madah, opis menteri iya benung chakah nengkebang platform dikena nyungkak penau ba seni pemerindang sebedau Palan Seni enggau Pemerindang ke benung digaga diatu dibuka.

"Kami nyukung amat program baka tu laban tu nyadi penyangkai sida ke ngembuan pengelandik ba seni enggau industri kreatif," ku iya madah baru.

Bela datai ba aum media nya Sapit Menteri Dagang Temuai, Industri Kreatif enggau Seni Pemerindang Sarawak, Datuk Snowdan Lawan.-EDISI UKAS