KUCHING: Sarawak bisi pengelebih nyadi ‘pemain’ industri pengetan pengelikun menua bepun ari pemansang ke benung nyadi maya tu.
Panglima Medan Timur Tentera Darat, Leftenan Jeneral Dato Mohd Sofi Md Lepi madah, pengelebih nya dibai timpai runding jauh ke menua dikembuan Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg ba pekara nyungkak pengintu pengelikun di Sarawak kelimpah ransing ngemansangka ekonomi nengeri tu.
"Kitai betuah amat laban ari Pakej Pengetan Pengelikun Sarawak diberi Premier Sarawak ulih nyaup kitai nyikap ngena teknologi ke bisi," ku iya madah.
Iya madah munyi nya maya dirandau media udah ngatur penemuai basa ngagai Yang Di-Pertua Negeri Sarawak Tun Pehin Sri Dr Wan Junaidi Tuanku Jaafar di Astana Negeri Sarawak, Hari Lima.
Kelimpah ari nya, ku iya, Tun Pehin Sri Dr Wan Junaidi bela ngarapka sektor pengetan pengelikun di Sarawak disungkak lalu ulih nyaup pengelikun menua.
"Ari pengandal Tun Pehin Sri Dr Wan Junaidi tadi, enggau nama ke nyadi ba kitai di Bintulu sereta di Sarawak ba pekara ekonomi hidrogen enggau ke bukai, aku andal Perintah Sarawak bisi siti pelin ke besai ke ulih nyaup industri pengetan pengelikun menua," pia ku iya.
Bekaul pengawa nemuai basa nya, iya madahka tuju sida deka ngelaluka penatai Tun Pehin Sri Dr Wan Junaidi ngagai Program Pemandang Pengetan Pengelikun Asia (DSA) Renggat Ke-18 ke deka diatur berengkah 6 ngagai 9 Mei 2024 ba Pusat Perdagangan Dan Pameran Antarabangsa Malaysia (MITEC), Kuala Lumpur.
Iya madah serak tu, komiti pengatur melabaka program nya deka digulu lebih 50,000 iku mensia mayuh ari lebih 70 buah menua ti bela nyengkaum 1,200 penyereta.
Nangkan nya, Tun Pehin Sri Dr Wan Junaidi mega bisi nerima penemuai basa ari raban sejarahwan ari Sarawak enggau Kelantan.-EDISI UKAS
