KUCHING: Duli Yang Maha Mulia Tengku Permaisuri Selangor Tengku Permaisuri Hajah Norashikin udah datai ngulu Pengerami Makai Lemai Ekspo Antarabansa Kraf Borneo (BCG) 2024 ditu, Hari Empat.

Pengerami lemai nya bela dirichah enggau penatai bini Yang di-Pertua Negeri Sarawak, Toh Puan Datuk Patinggi Fauziah Mohd Sanusi enggau bini Speaker Kunsil Nengeri (DUN) Sarawak, Puan Sri Datin Amar Fatimah Mohamad Iskandar.

Bejaku maya nya, Sapit Menteri Dagang Temuai, Industri Kreatif enggau Seni Pemerindang Sarawak Datuk Snowdan Lawan madah ke pemesai reti ngatur Ekspo Antarabansa Kraf Borneo ke nyadi pelasar mandangka seni enggau daya idup menua tu ngagai tikas antarabansa.

"Kitai ngemeratka pekara bekaul inovasyen, pemeruan enggau pesaka daya idup Sarawak.

"Nya alai, kami deka meda Sarawak nyadi menua kraf ke ditapat mensia mayuh ari selampur dunya," ku iya madah.

Iya mega madah, program ke diatur nya bela meri awak ngagai sida ti rindu ke seni kraf menua tu.

Pengerami makai lemai nya mega sebagi ari pengawa dikena ngenegapka agi kerejasama ba sektor dagang temuai, seni kreatif enggau kraf. -EDISI UKAS