BAU: Perintah Sarawak semampai meras deka majakka pengawa nyukat tanah Hak Adat Bumiputera (NCR) enggau Genturung Pendiau Lama.

Sapit Premier Sarawak, Datuk Amar Awang Tengah Ali Hasan madah, urung 1.2 juta hektar tanah NCR benung diperati alai inisiatif nya deka ditandu baru nitihka peminta orang beempu tanah.

"Pengawa nyukat tanah digaga dua renggat. Keterubah disukat kelinggi ngena Seksyen 6 Kanun Tanah Sarawak.

"Renggat kedua iya nya disukat individu lalu sida ke beempu tanah deka bisi hak beempu tanah nengah Seksyen 18," ku iya madah.

Iya bejaku munyi nya maya Pengawa Nyuaka Gazet Seksyen 6 Kanun Tanah Sarawak enggau Hak Ngempu Tanah Seksyen 18 Kanun Tanah Sarawak ditu, Hari Empat.

Kelimpah ari nya, Datuk Amar Awang Tengah madahka Sarawak semampai
deka besaup enggau Opis Pengawa Berumah enggau Perintah Menua bekaul inisiatif ngaga rumah ulih diempu enggi perintah besai ke bungkus RM13 bilion ke deka dipenyadi taun baru.

Ku iya, Sarawak mega ulih nyendiaka tanah dikena nyukung inisiatif nya.

"Perintah nengeri udah ngepunka macham projek pengawa berumah ti pulaika penguntung ngagai rayat, lalu kami semampai deka nyaup perintah besai senentang pekara tu," ku iya madah baru.

Nangkan nya, pemberita Unit Komunikasi Awam Sarawak bisi ngerandau penerima hak beempu tanah iya nya Rosna Demong enggau Joem Abang ti beterima kasih ngagai perintah udah ke nerima surat pala tanah sida.

Pengawa maya bela digulu Speaker Kunsil Nengeri (DUN) Sarawak, Tan Sri Datuk Amar Mohamad Asfia Awang Nasar, Sapit Menteri Pengangkut Dato Henry Harry Jinep, Penyanding Penemu Opis Menteri Dagang Antarabansa, Industri enggau Pemeranak Puku Sarawak (MINTRED) Dato Sri Mohd Naroden Majais, Penguasa Opis Tanah enggau Survei Sitak Kuching Awang Nazri Awana Saperi, Pegawai Pelilih Bau Constantine Jonas Noeb sereta bala bukai. -EDISI UKAS